BISPERAS sa implementasyon sa modified enhanced community quarantine (MECQ) nakahigayon ko og biyahe gikan sa Barangay Punta Engaño sa siyudad sa Lapu-Lapu padung sa isla sa Olango. Mao pa ni una nakong paglawig sukad nga na-assign ko nga mo-cover sa pagpangita sa usa ka dakong opisyal sa gobyerno nga gii-ngong gihulog sa dagat pipila na ka tuig ang nakalabay. Bayente tres ka adlaw ko nga nagsige og kuyog sa Philippine National Police ug volunteer divers pagtuman sa ilang misyon, mao nga sinati kaayo nako ang kadagatan dinhi. Namuwak sa daghan kaayong sakyanan sa dagat nga gisakyan sa liboan ka mga langyaw ug lokal nga turista. Panahon to nga wala pa si Covid.
Sa paghibalik nako sa miaging Sabado, kuyog ang pamilya sa duha nako ka mga manghod aron mangaligo, pipila na lang sa mga pump boat ang naglawig didto nga may sakay nga mga bisita. Tungod ba kaha kay bisperas kadto sa implementasyon sa MECQ? Usa ni sa gihatag nga rason. Apan ang sulti sa mga namaligya og tihi tihi ug suwaki didto, sukad sa pagsugod sa pandemiya sa miaging tuig, naunlod ang turismo dinhing dapita.
Didto sa baybayon sa Taluma, pagka daghan sa mga pumpboat nga gipapahuway kay way booking. Mao man unta ni ang maghakot sa daghang pasahero kaniadto aron mag island hoping. Kay way turista, nalumos pud sa utang ang mga nagsalig sa turismo dinhi. Apan kon ubos sa MECQ, tugutan nga makalangoylangoy ang mga bisita dinhi, naa pa gihapoy mahagdaw nga sensiyo ang mga nanginabuhi dinhi.
Sama sa mga nanginabuhi nga gitugutan sa pagpadayon sa ilang naandan nga panginabuhian bisan kon MECQ, bintaha kaayo. Dalaygon ang hukom sa mga nagdumala niining Covid-19, pagpadayon sa transportasyon ug negosyo panahon sa MECQ. Way gustong mamatay tungod sa virus. Labaw nga way gustong mamatay tungid sa kagutom.
Apan di sab maayong padunggon ilabi na ang mga kabus, nga wala nay kuwarta ang gobyerno aron makapanghatag og ayuda. Nahurot na diay ang pundo? Pag sure mo uy. Palihug hatagi ninyo og klarong kwentada ang katawhan. Ug labaw sa tanan prangkahi si Juan dela Cruz, nga bisan usa ka kilong bugas, wala nay matunol kay bangkarota na ang atong panudlanan.
Subay niini gitug-anan ko sa akong amigong driver sa Mega Taxi nga sugod ugma tag P450 nalang ang ilang abang gikan sa tag P700. Si Premy Jongoy nii-ngon nga ang hukom pagpaus-os sa abangan, gipahaum nunot sa pagpailawom sa Sugbo ubos sa MECQ. Pagka nindot ning balitaa.
Ang nakanindot ra ba kay bisan niadtong wa pay Covid, daan nang gilibre sa management ang abangan sa adlaw nga Dominggo. Kumusta man ang ubang taxi driver? Sige gihapon tawong puno sa bitay ang aba-ngan tungod sa kanihit sa pasahero ning panahona.
Di gyud ko makalimot nga niadtong naghinangat ang Asean Summit, nangita ang gobyerno ani nila kay bansaybansayon unsaon pag-atiman og mga turista. Ang ilang estorya nga kining mga taxi driver dako kaayog natampo pagpalambo sa turismo sa atong nasod. Apan sa pagsugod sa lockdown hangtod karon, ambot kon nangita ba nila ang gobyerno aron tagaan og ayuda?