GIAPROBAHAN sa Inter-Agency Task Force for the Management of Emerging Infectious Diseases (IATF-MEID) ang pag-apelar ni Gobernador Gwendolyn Garcia nga paubsan kun paluagan ang community quarantine classification niini.
Sa Resolution no. 130-D nga giluwatan sa Agusto 1, 2021, gipaubos sa IATF-MEID ang Probinsya sa Sugbo ngadto sa general community quarantine (GCQ) with heightened restrictions hangtod Agusto 15 gikan sa modified enhanced community quarantine (MECQ) status unta niini.
Apan ang tulo ka highly-urbanized nga Siyudad sa Cebu, Mandaue, ug Lapu-Lapu kasamtangang gipaubos gihapon sa MECQ.
Lakip sa gitawag nga heightened restrictions nga kinahanglan ipatuman sa Probinsya sa Sugbo karon mao ang mga mosunod:
Padayon nga maka-operate ang food preparation establishments sama sa commissaries, restaurants, ug eateries apan makapasulod lamang og 20 porsiyento alang sa dine-in services ug 50 porsiyento alang sa outdoor dine-in services kun al-fresco.
Samtang maka-operate gihapon ang personal care services, sama sa beauty salons, beauty parlors, barbershops, ug nail spas apan makapasulod lamang sila og 30 porsiyento sa ilang venue kun seating capacity.
Kadto ra usab nga services kon asa pwedeng makasuot og face mask ang kliyente ug service provider ang mamahimo na mahatag ani nga mga establisemento.
Ang meetings, incentives, conventions, ug exhibition events ug social events sa venue establishments wala gitugot sa pagkakaron.
Makaabli gihapon ang outdoor tourist attractions, apan 30 porsiyento lamang sa total nga kapasidad niini ang pwede makasalmot. Hingpit usab nga ipatuman ang minimum public health standards.
Samtang ubos sa Safety Seal Certification Program, ang business establishments nga gi-awardan og Safety Seal Certifications mamahimo gihapong maka-operate og dugang 10 porsiyento sa prescribed on-site capacity kun venue/seating capacity. Depende kon asa niini ang applicable.
Dili pa usab maka-operate ang indoor sports courts ug venues ug indoor tourist attractions.
Gitugutan ra nga maka-operate ang specialized markets sa DOT sama sa staycations (without age restrictions) subay sa kapasidad, protocols, ug restrictions nga gipatuman sa DOT.
Gitugot ang interzonal travel kun pagbiyahe gikan sa usa ka community quarantine status ngadto sa lugar nga lain og community quarantine status, apan subay sa restrictions nga iimplementar sa LGU of destination.
“Point-to-point travel to area under GCQ and modified GCQ will be allowed without age restrictions subject to an RT-PCR test-before-travel requirement for those below 18 years old above 65 years old and other protocols and restrictions as may be imposed by the DOT and the LGU of destination,” dugang sa IATF-MEID.
Gitugot ra usab ang religious gatherings apan 10 porsiyento lang sa kinatibuk-ang kapasidad niini ang gitugot ug kon wala kini nakalapas sa protocols sa hingtungdan nga LGU.
“The LGU may also increase the allowable venue capacity up to 30 percent. While all religious denominations are also asked to strictly observe their submitted protocols and the minimum public health standards,” sigun sa IATF.
Limitado lamang sa immediate family members ang pagtapok tapok alang sa pagtambong og necrological services, haya, inurnment, funerals alang sa mga namatay nga dili tungod sa Covid-19.
Apan kinahanglan hingpit nga tumanon ang minimum prescribed health protocols.
Upat ka adlaw ang nilabay, Hulyo 29, unang gianunsyo sa Malacañang nga ipaubos sa MECQ ang mga siyudad sa Mandaue ug Lapu-Lapu ug ubos gihapon sa MGCQ ang Siyudad sa Sugbo ug Probinsya sa Sugbo.
Apan niadtong Hulyo 30, gianunsyo ni Presidential Spokesperson Harry Roque nga ipaubos na ang tibuok Cebu ngadto sa MECQ.
Human sa tigom ni Garcia tali sa ubang mga opisyal sa Sugbo niadtong Biyernes, Hulyo 30, 2021, niduso gilayon siya sa apelasyon sa Lalawigan.
Hinuon nasabutan usab nila nga ipatuman kon unsa man nga quarantine classification nga luwatan sa IATF isip One Cebu.
Ang tulo ka mga mayor sa tulo ka mga siyudad niapelar usab, apan sa pagsuwat ning taho wa pay paborableng tubag ang IATF.