Pulis sa lungsod sa Asturias nga napalgang positibo sa coronavirus disease 2019 (Covid-19) namatay sa Toledo City Hospital mga alas 3 sa hapon sa Dominggo, Agusto 1, 2021.
Ang namatay giila ni Police Major Gilfred Baroman nga si Police Executive Master Sergeant Thadeo A. Lapening, deputy chief sa Asturias Police, taga Barangay Tubod, Dakbayan sa Toledo.
Matod ni Baroman nga si Lapening nanawag kaniya sayo sa buntag sa Hulyo 26, 2021 nga di siya maka duty kay naglain ang iyang lawas.
Sa mga ala 1 sa hapon sa Hulyo 30, nipahibawo kini kanila nga naluya siya ug nagkalibanga.
Nagpahiling siya sa Toledo City Hospital ug gi admit sa samang adlaw.
Sa Hulyo 31, gipailawom si Lapening sa swab test.
Matod ni Baroman nga nianang mga alas 10 sa buntag sa Agusto 1, nipahibawo kanila si Lapening nga positibo siya sa Sars-CoV-2, kagaw nga nagdala sa Covid-19.
Nakugang na lang sila human gipahibawo nga si Lapening namatay mga alas 3 sa hapon sa samang adlaw tungod sa mga komplikasyon sa Covid-19. (GPL)