NISAMOT ang pag-init sa politika sa nasud. Niadtong niaging semana, pormal na nga nagdeklara si Senador Panfilo (Ping) Morena Lacson Sr. nga modagan pagka-presidente ubos sa Partido para sa Demokratikong Reporma (PDR) sa Mayo 2022.
Niadtong Hulyo 29, nanumpa si Lacson pagka-chairman sa PDR nga kanhi sa Lakas ng Demokratikong Pilipino (LDP) ug nahimong independente. Ang iyang ka-tandem pagka-bise presidente mao si Senate President Vicente "Tito" Castelo Sotto III nga kanhi sa LDP, United Nationalist Alliance (UNA), National People's Coalition (NPC) ug sa Hugpong ng Pagbabago (HNP) ni Mayor Sara Duterte-Carpio. Base sa ilang inisyal nga plano de campaña, makig-alayon ang ilang puwersa sa NPC ug UNA aron buntugon ang ibutang nga kandidato sa administrasyon ni Pangulong Rodrigo R. Duterte.
Hinuon, hangtud karon wa pay klaro kung kinsa ang ibutang nga "standard bearer" sa dako apan nagkayamukat nga Partido Demokratiko Pilipino-Lakas ng Bayan (PDP Laban).
Ang Pimentel-Paquiao wing sa PDP Laban maghimo pa'g National Assembly karong Septyembre nga posibleng moduso kang Sen. Manny Pacquiao nga modagan pagka-presidente.
Sa laing bahin, ang Duterte-Cusi wing sa PDP Laban sa ila pud nga National Assembly niadtong Hulyo 17 niduso na pagka-bise presidente si PRody Duterte samtang "secret" pa ang ilang kandidato pagka-presidente.
Apan kung nalibog pa ang taga-kaulohan, kita diri sa Davao di na malibog ug gani kanang "secret candidate" kuno kay "open secret" na nato.
Niadtong katapusan sa Hulyo, gitukod ang dakong kalihukan nga gitawag og "Sara All Philippines 2022" (SAP 2022). Gipasiugdahan kini sa Mayor Sara Duterte Alliance (Masada) nila ni DOE USec Benito Ranque ug iladong political strategist nga si Fred Pontillo ug uban pang grupo uog personalidad nga naghandom nga magpadayon ang gitawag nga "Duterte legacy for inclusive national peace, progress and development."
Nagpagawas ang SAP 2022 og deklarasyon nga magtambayayong ug magkahiusa sila aron matuman ang tumong nga modagan si Mayor Sara Duterte pagka-presidente karong 2022 ug tabangan siya nga makalingkod sa Malacanang.
Gilangkuban kini sa daghang grupo nga nitabang sa iyang amahan niadtong 2016 national election ug mid-term election sa 2019.
Ang tanang pangulo sa mga organisasyon nga niapil kay molingkod isip sakop sa National Coordinating Council (NCC) nga maoy mopanday sa mga giya ug pamaagi sa pagtinabangay sa kampanya.
Ubos niini ang National Coordinating Secretariat nga maoy motabang nga mapasunod ug mapahamtang ang plano ug sugo sa NCC. Ang NCC ug secretariat kay ibutang dinhi sa Davao City aron duol kini sa poder ni Mayor Inday Sara nga maoy sentro sa ilang panaghiusa.
Sa pagkakaron, adunay tahas ang SAP 2022 nga padayong mag-awhag kang Mayor Sara nga modagan; padayong magpalig-on sa ilang tagsa-tagsa ka organisasyon ug han-ay; pagpalig-on sa sistema sa koordinasyon ug pagtinabangay; pag-andam nga motabang kang Mayor Sara sa iyang paglibot ug pagkonsulta sa katawhan sa tibuok nasud aron masayran ang ilang kahimtang og ilang baruganan kabahin unya sa iyang magsalang sa nasudnong politika sa 2022.
Matud pa sa SAP 2022 nga si Mayor Sara lamang ang may sarang kakayahan nga mopadayon sa damgo ug tinguha sa iyang amahan sa nasud.