KIDAPAWAN CITY -- Nahulog ug nabalintong daplin sa kalsada ang delivery van alas 9:45 sa buntag, Dominggo, sa Makilala, North Cotabato.
Atol sa hitabo, naangol si Luther Alforque ug laing tulo niya ka kaubanan nga pulos taga Matina, Davao City.
Sa taho gikan sa Traffic Division sa Makilala Municipal Police Station, nasayran nga gikan sa Davao City ang delivery van nga gimaneho ni Alforque nga dunay karga nga mga produktong Nestle.
Apan pag-abot nila sa Sitio Flortam, Barangay Batasan sa nahisgutang lungsod, kalit lang nawad-an og preno ang van.
Wala na makontrola sa drayber ang manobela, hinungdan nga nahulog ang van daplin sa national highway ug mibaliktad.
Abtik nga nagresponde ang mga sibilyan ug gitabangan ang mga biktima ug gihatud ngadto sa balay tambalanan.
Sumala sa saysay sa mga nakasaksi sa maong dapit nga kusog ang dagan sa van apan pag-abot niini sa likuon nga bahin sa kalsada ni-overshoot, resulta sa disgrasiya.
Kahinumdoman nga duha sab ka kolektor ang nakabsan sa kinabuhi sa nahisgutang dapit sa diha nga gibanggaan sa prime mover truck ang gisakyan nilang motorsiklo niadtong miaging adlaw.
Nagpasidaan ang Makilala police sa mga drayber nga mag-amping sa pagmaneho ilabi na sa mga accident prone area sa lungsod. (Edgar E. Fuerzas)