GIPANGDALA sa presinto sa Marilog Police Station ang 14 ka mga bikers human kini nagtapok sa Tamugam River ug nagtagay pa og ilimnong makahubog alas 3 sa hapon niadtong Dominggo, Agosto 1, 2021.
Sumala ni Police Captain Philip Dave Uddin, hepe sa Marilog police, nga nakadawat sila og impormasyon labot sa mga bikers.
Sanglit gidili ang pagtapok-tapok labi na ang pagtagay og makahubog sa Davao City, gipangdala sa presinto ang mga nahisgutan.
Gawas nga wala sila naka-face mask, nakuha pa sa ilang posisyon ang usa ka botelya sa ilimnong makahubog ug usa ka pitcher.
Usa ka 22-anyos nga biker ang giingong nisukol pa sa awtoridad sa dihang gipangbadlong sila.
Sa 14 nga gipangdakop, walo niini ang menor de edad nga nakatakdang i-turnover sa mga ginikanan samtang ang 6 ang pasakaan og kaso labi na ang 22-anyos sa iyang pagsukol sa awtoridad. (Jeepy P. Compio)