TUWING Agosto ng bawat taon, ipinagdiriwang natin ang Buwan ng Wika bilang pagpapalawig sa pagdiriwang ng Linggo ng Wika mula noong Enero 15, 1997 sa pamamagitan ng Proklamasyong Bilang 1041 ni dating Pangulong Fidel V. Ramos. Sa pangunguna ng Komisyon ng Wikang Filipino, temang “Filipino: Wika ng Pambansang Kaunlaran,” nilalayon ng pagdiriwang na ito na maipakita ang kahalagahan ng wika na higit pa sa pambansang kaunlaran. Ang tema ay hinati rin sa apat na diwa, na siyang magiging tema sa bawat lingo ngayong buwan. Ito ay Filipino: Wika ng Kaunlarang Pangkultura, Wika ng Kaunlarang Pang-ekonomiya, Wika ng Kaunlarang Panlipunan, at Wika ng Kaunlarang Panteknolohiya.
Ang wika ay buhay at nagbabago—ito ang matalas kong naalalala sa mga natutunan kong aralin noong ako ay nasa high school pa lamang tuwing tatalakayin ang mga paksa ukol sa wikang Filipino. Ito ay patuloy na nagbabago sapgakat kaakibat nito ang pamumuhay ng tao at iniaangkop ito sa mabilis na takbo ng buhay dulot ng agham at teknolohiya. Bilang wikang dinamiko, bukas ang pintuan nito sa pagbabago upang makaangkop sa mga pangangailangang pangkomunikasyon ng sambayanang gumagamit nito. Ang mga salita ay patuloy na dumarami, nadaragdagan at umuunlad. Lumalawak ang mga bokabularyo, nagbabago ang sistema ng pagsulat at paglabaybayan.
Ang mga “jargon” o ang mga grupo ng mga salita o terminong kakaiba o natatangi sa isang larangan o propesyon ay patunay sa katangiang dinamiko ng wika. Mahigit isang libong taong nakakaraan, wala ang mga salitang paukol sa teknolohiya ng “computer” tulad ng internet, Google, wifi, hyperdrive, pati na ang Facebook at salitang selfie, at marami pang iba.
Isang halimbawa din ng pagbabago ng wika ay ang pagkasilang nga iba’t ibang uri ng komunikasyon at isa na riyan ay ang tinatawag na “gay lino” o “beki language.” Sa mga websites na tulad ng Bekimon 101, Badingtionary, o Bekinary, makikita ang napakaraming mga salitang ginagamit ng mga “beki” na tila biglang sumulpot kaakibat ng moderno at liberal na pamumuhay ngayon sa pagiging bukas na lipunan sa mga ganitong klaseng kagustuhan. Kung pakikinggan at susubukang intindihin, talaga naming nakakaaliw ang pakikinig sa mga taong nag-uusap na gamit ang gay lingo, halimbawa: “Bet kong italak sayez na witit makakajosok sa skulembang si junakis ngayonchi. Rarampage si atashi now at bet kong kajoin force si bebemon.”
Sa aking sariling pananaw, mas maigi na ituon muna natin ang ating pansin sa paggamit ng ating mga sariling dayalekto o lengwahe tylad ng Kapampangan bilang wika sa pagtuturo kaalinsunod ng Mother Tongue-Based-Multilingual Education (MTB-MLE) na bahagi ng reporma sa edukasyon na K to 12 Program sapagkat ako ay naniniwala na ang mga reporma sa bagong curriculum ay nagnanais na tumugon sa hamon na mahasa ang ating kabataan na gamitin at palawigin ang wikang ating kinagisnan pati na rin ang ating Pambansang Wika.