ANAA na sa 12,786 ang kinatibuk-ang ihap sa mga kaso sa coronavirus disease (Covid-19) sa Cagayan de Oro human nakatala kini og 268 ka mga kaso sulod sa duha ka adlaw, pulos mga local transmissions.
Sumala sa report sa City Health Office, sa 268 ka mga bag-ong lokal nga mga kaso, 147 ang mga local index nga mga kaso, 75 ang mga close contacts sa mga pasyenteng nagpositibo sa coronavirus, 21 ang mga local authorized persons outside residence (Apors), 18 ang mga Apors with link, ug pito ang mga patay.
Ang ihap sa mga aktibo nga kaso sa Cagayan de Oro aduna na sa 1,823.
Sa maong numero, 563 niini na-admit sa Northern Mindanao Medical Center ug uban pang mga ospital sa syudad ug 1,260 ang mga outpatients.
Nakatala usab og 73 ka mga Covid-positive nga mga kaso nga karon naka-recover. Anaa na karon sa 10,407 ang ihap sa mga nakarekober nga mga kaso sa dakbayan.
Ang ihap sa mga namatay sa Covid-19 sa syudad anaa na sa 556.