Gipanalipdan sa hepe sa kapulisan sa Probinsya sa Sugbo ang duha ka mga police sa lungsod sa Tuburan nga nakapusil patay sa usa ka lalake nga namato kanila atol sa ilang pagresponde og alarma.
Nahitabo kini niadtong Sabado, Hulyo 31, 2021, pasado alas 7 sa buntag sa sitio Gumamela, Barangay Daang Lungsod, Tuburan.
Matod ni Cebu Police Provincial Office chief Police Colonel Engelbert Soriano nga lihitimo ang operation nila ni Police Patrolman Johnny Iway Tejana ug Police Patrolman Richard Rebaca.
“I would like to highlight that it was a legitimate police response. Ang ano dyan ang subject doon ay under barangay protection order. Nung nag response yung police natin, ay instead na siyay makipag-usap ng maayos, akma naman siyang mag a-attempt na damputin ang kanyang firearm,” matod ni Soriano.
Nakadawat og tawag sa telepono ang Tuburan Police Station gikan sa mga barangay tanod labot sa giingong pag wild ni Danilo Samapalad, 43.
Sa dihang mitubag sa alarma sila si Tejana ug Rebaca, sila gibato na hinuon ni sila ni Samapalad bisan kon nagpaila pa sila nga mga tinugyanan sa balaod.
Niduol ang duha ka mga pulis aron unta ilang pahunongon sa pag saba-saba si Samapalad, apan nagpadayon kini sa pagpamato.
Tungod niini napugos ang mga police sa pagpabuto isip warning shot nga niresulta sa pagdagan ni Samapalad sa sulod sa iyang balay diin didto ang iyang asawa.
Gisunod ni Tejana aron kombinsihon nga mo-surrender apan kalit lang miabli ang pultahan ug dayong tion sa dala niini nga mahait nga hinagiban dungan sa bahad sa mga pulis nga dili siya magpadakop nga buhi.
“Magpatay ta ninyo, Sir. Dili ko padakop buhi,” kutlo sa mga pulis sa sulti ni Samapalad.
Nabantayan sa duha ka mga pulis nga nilanit sa iyang armas si Samapalad nga giluklok sa kilid sa lawas.
Diha na mihukom si Tejana sa pagpusil isip self defense.
Nakuha gikan sa lawasni Samapalad ang usa ka kalibre .38 nga paltik revolver nga adunay usa ka bala.
Bisan kon nigawas sa resulta sa imbestigasyon nga lehitimo ang operasyon, apan nimando gihapon si Soriano sa hepe sa Tuburan nga ipaubos sa imbestigasyon sila si Tejana ug Rebaca.
Apan dili siya momando pagpaubos sa camp restriction sa iyang mga sakop ug magpadayon kini sa trabaho. (AYB)