Lola nasuko nga dili na makigbalik kaniya ang bana, nitigbas ini ala 1:30 sa hapon sa Dominggo sa Barangay Manlagtang, lungsud sa Tabogon, amihanang Sugbo.
Ang biktima giilang si Alvino Villamente, 73, samdan sa ulo ug ubang parte sa kalawasan human tigbasa sa iyang asawa nga si Anita Luisa, 74, kinsa gitanggong sa kapulisan human nadakpan.
Si Police Master Sgt. Ben Anthony Alburo sa Tabogon Police Station nga nahinabi sa Superbalita Cebu nagkanayon nga si Alvino giapas ni Anita niadtong Dominggo, sa ilang balay.
Matod ni Alburo nga si Anita gimingaw sa iyang bana kay tulo ka buwan na silang nagkabuwag. Si Alvino didto na mopuyo sa balay nga nahimutang sa luna nga gipabantayan kaniya sa tag-iya.
Si Anita usab didto nitipon sa ilang anak nga babaye.
Sumala pa ni Alburo nga nibiya si Alvino kang Anita kay dili na niya maaguwanta ang pagkamaldita, pagpanapat ug kaselosa sa iyang asawa.
Kay gimingaw si Anita, niadto siya sa gipuy-an ni Alivino ug nihangyo nga mopauli na sa ilang balay.
Si Anita nangayog pasaylo, nihangyo nga ilang ipadayon ang ilang relasyon.
Apan si Alvino nagmagahi, hugot ang baruganan nga dina makig-uli kang Anita nakalingkawas na siya sa pagka battered husband.
Nasuko si Anita, sa pagtalikod ni Alvino,kalit niyang gitigbas ang ulo, lawas ingon man bukton sa iyang bana gamit ang sanggot.
Nakapangayog panabang sa mga silingan si Alvino ug nadala sa tambalanan.
Si Anita didto na madakpi sa miresponding mga pulis sa balay sa iyang anak babaye.
“Ana si Lolo nga dili na gyud siya makig-uli kay magsige lang silang away. Unya bun-ogon sa iyang asawa. Naghilak man ri siya,” sumala ni Alburo.
“Puslan man dili siya makigbalik nako, maypag patayon, kay kon namatay to siya, aw magdunggab sab ko sa ako tiyan para tupad mi sa lubong,”kutlo ni Alburo sa sulti ni Anita.
Dugang ni Alburo nga dihang naabot si Alvino sa Lunes sa buntag alang pagpreparar sa kaso, si Anita nagsigeg hawok, nihangyo nga magbalik na sila kay “gimingaw na kaayo ko nimo.”
Apan si Alvino nibalibad kaniya mopasaka siyag kasong attempted murder aron maputol na sa hingpit iyang pag-antos.
Ang kapulisan nakakakuha sa crime scene sa sanggot, sundang ug kutsilyo nga gigamit ni Anita.