Konsehal sa Dakbayan sa Mandaue nga si Carmelino “Jun” del Mar namatay na niadtong Agusto 2, 2021. Kini gikompirmar ni Mandaue City Mayor Jonas Cortes sa usa niya ka press conference.
Niadtong Hulyo 22, nag-post si del Mar nga siya ug ang iyang asawa nagpositibo sa Covid-19. Daan nang naglain ang iyang lawas niadtong Hulyo 19.
Matod ni Cortes nga ang pagkamatay ni Del Mar komplikasyon sa coronavirus disease 2019 (Covid-19).
Matod ni Cortes nga si Del Mar nagsugod sa pagpanerbisyo isip konsehal sa Barangay Ibabao-Estancia hangtod nga nahimo siyang kapitan sulod sa tulo ka termino, una pa nahimong konsehal sa dakbayan sa Mandaue.
Matod ni Cortes nga dako og natabang si Del Mar sa dakbayan labi na bahin sa kalikopan pinaagi sa pagpasar og mga ordinansahon.
Alang ni Cortes si Del Mar higala, kauban sa serbisyo ug public servant. Dako ang pasalamat ni Cortes kang Del Mar sa iyang pagserbisyo ug mipadangat sab siya sa iyang pgpaasubo sa pamilyang Del Mar.
Gawas ni Cortes mipadangat sab sa ilang pahasubo ang iyang kaubang mga konsehal nga silang Immaline Cortes-Zafra, Jimmy Lumapas, Nerissa Soon-Ruiz ug Malcolm Sanchez.
Sa laing bahin, matod ni Cortes nga isip pahinungod sa pagtaliwan ni Del Mar, i-half mast sa dakbayan ang Philippine flag sa Mandaue City Hall.
PULIS PATAY SAB
Pulis sa lungsod sa Asturias nga napalgang positibo sa coronavirus disease 2019 (Covid-19) namatay sa Toledo City Hospital mga alas 3 sa hapon sa Dominggo, Agusto 1, 2021.
Ang namatay giila ni Police Major Gilfred Baroman nga si Police Executive Master Sergeant Thadeo A. Lapening, deputy chief sa Asturias Police, taga Barangay Tubod, Dakbayan sa Toledo.
Matod ni Baroman nga si Lapening nanawag kaniya sayo sa buntag sa Hulyo 26, 2021 nga di siya maka duty kay naglain ang iyang lawas.
Sa mga ala 1 sa hapon sa Hulyo 30, nipahibawo kini kanila nga naluya siya ug nagkalibanga. (KFD, GPL)