Personnel, di beds, kuwang sa mga tambalanan

Niabot ngadto sa 50 ka mga barangay sa dakbayan sa Sugbo ang gigikanan sa 413 ka mga tawo nga positibo sa coronavirus disease (Covid)-19 sa Agusto 1, 2021.

Sa samang adlaw, 150 ang naka-recover niadtong Agusto 1, 2021.

Kini ang gipahibawo ni Cebu City Councilor Joel Garganera, deputy chief implementer sa Emergency Operations Center (EOC), diin lima na lang sa 80 ka mga barangay nga sakop sa Cebu City way reported nga transmisyon sa virus sa miaging 10 ka adlaw.

Ang barangay Guadalupe maoy nag-una nga adunay 44 , Tisa (25), Talamban (21), Camputhaw (18) ug Lahug (17) base sa talaan sa mga kaso sa Agusto 1.

PERSONNEL KUWANG

Samtang si Acting Mayor Michael Rama nagkanayon nga dili lang ang Cebu City Medical Center (CCMC) ang nagkuwang og nurses ug ubang medical personnel, nasinati usab kini sa mga private hospital.

Duna pa untay Covid beds ang pipila ka mga tambalanan, apan di makadawat og pasyente kay way medical personnel nga makatagad.

Sa Cebu City, nga adunay 15 ka hospitals, 11 niini pribado, anaa pa lang sa 580 ang okupado gikan sa 1,023 ka beds nga gitagana kun 56.7% occupancy rate.

Apan matod pa ni Rama nga dili mapasudlan og pasyente sa Covid ang bakanteng higdaanan sanglit wa nay available nga medical personnel.

Si Garganera niingon nga duha ka mga hospitals ang nag-operate lapas na sa 90% sa ilang occupancy rate, tulo ang high risk, tulo ang moderate ug pito ang gikonsidera nga safe pa ang ilang operation.

Gumikan niini, gusto ni Rama nga mosulod na ang Department of Health (DOH) 7 aron maoy mangita og health care worker sa ubang rehiyon kansang kaso sa Covid ubos aron motabang sa Cebu sama sa gibuhat niini ngadto sa Manila dihang nidaghan og maayo ang ilang mga kaso.

Andam mohatag og incentives ang City Hall.

Si Garganera, sa iyang bahin, nagkanayon nga ang 413 ka positive maoy labing daghan sa Cebu City sukad sa miaging tuig, diin 20.7% ang positivity rate niadtong Agusto 1.

Iya kining gihulagway nga makapaalarma sanglit sa sayong mga buwan niining tuiga, 2& ngadto 5% ra ang positivity rate sa dakbayan.

Gitumbok sa konsehal sa north district nga ang hinungdan sa pagdaghan sa nagpositibo mao ang pagpakonsulta sa mga tawo nga adunay gihambin nga balatian, kadtong mobiyahe ug gipangitaan para sa ilang pagpanarbaho.

MOABLI

Dugang sa konsehal nga isip preparasyon sa pagsaka sa mga kaso sa Covid-19, moabli og dugang isolation centers ang City Hall nga langkuban sa Don Sergio Osmeña, Talamban, Banilad ug Cremdec sa barangay Taptap ug Cebu City Sports Center nga maoy mega isolation center.

Dugang mga hotel ang moabli isip isolation centers karong semanaha, tug-an ni Garganera.

Sa kasamtagan, ang Cebu City Quarantine Center (CCQC) adunay 51 beds nga bakante, 203 sa mga barangay isolation center ug 61 ka mga hotel.

Si Dr. Jeffrey Ibones, pangulo sa City Health Department, niingon nga bisan ubos sa mas istrikto nga quarantine classification , padayon gihapon ang vaccination rollout apan giawhag labi na kadtong mga senior citizen nga dili mogawas kon walay text nga madawat gikan sa City Government para magpabakuna sanglit wala gitugot ni Rama ang walk-in sa mga gustong magpabakuna.

Ang Cebu City aduna nay 30, 077 ka confirmed cases, 2,442 ang nahabilin nga aktibong kaso samtang 947 ka mga tawo ang nangamatay.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph