Mga publikong sakyanan hugot nga bantayan sa kapulisan sa siyudad sa Sugbo human masuta nga kasagaran kanila nag over loaded na.
Tungod niini, ang kapulisan sa siyudad sa Sugbo nibahad nga dili lang ang mga driver ang dakpon, lakip na ang mga tawo nga manakay.
Gimandoan karon sa Cebu City Police Office ang mga pulis nga nagpahigayon sa ilang checkpoints sa mga quarantine control points nga estriktong mosusi sa mga public utility jeepneys ug mga bus nga nagdagan sa siyudad sa Sugbo aron matuman ang minimum health standard sa mga pasahero nga sakay niini.
Matod ni Police Lieutenant Colonel Wilbert Parilla, deputy city director for operation sa CCPO, nga nakita sa Emergency Operations Center (EOC) nga usa sa mga hinungdan sa tinakdanay mao ang pagdikit sa mga pasahero.
Una nang naalarma ang kapulisan human niabot og kapin sa 400 ka mga tawo ang nagpositibo sa coronavirus disease 2019 (Covid-19) sa Agusto 1, 2021.
Duna na say mga ospital nga wa nay bakante alang sa mga pasyente sa Covid-19.
Dugang ni Parilla nga nasabotan atol sa meeting sa EOC, Land Transportation Franchising and Regulatory Board (LTFRB) 7 uban sa mga PUJ ug PUB operators nga kon adunay mga depasaheroan nga sakyanan ang madakpan nga nag overloading, di lang ang driver dakpon, lakip na kining mga tawo nga mopugos sa pagsakay.
Pasabot niya nga kon adunay nagbarog nga pasahero nga makita sa sulod sa mga bus o mga PUJ, dakpon kini dayon, apil na ang mga pasahero.
Gimando sa EOC nga 50 posiyento lang nga capacity sa PUJ ug PUB ang tugotan nga makasakay aron matuman ang social distancing.
“Usa sa mga kabag-ohan karon nga dili lang ang driver ang ang atong i-apprehend, hasta ang pasahero nga nag overload labi na kon makita nato nga nag standing na siya. So, aware na siya daan nga overload na siya,” matod ni Parilla.
Adunay lima ka quarantine control points nga gi montar sa CCPO diin dili lang mga pulis ang na assign, naa usab ang mga sundawo nga gi augment sa Central Command (Centcom).