Makasabot kaayo ko niining sentimento sa atong mga opisyal nga wala makauyon sa lockdown kay makaguba sa ekonomiya.
“Don’t mess with us. We can take care of ourselves. I will not and never again accept a lockdown. I’ll fight for Cebu and the Cebuanos,” matod pa ni Gob. Gwen Garcia.
Ang nakaapan lang kay tinuod man ang Covid-19 ug kining mas makalilisang nga Delta variant, intawon. Motuo gyud ko nga naay Covid-19 kay natakdan lagi ko sa miaging Abril.
Nakasulay na man ko og flu ug kining pneumonia. Naospital pa gani. Apan lahi ra gyud kining Covid-19. Mura kag gi-flu kay sakit tibuok lawas nga sagol ang way undang nga hutoy ug sakit sa ulo.
Mild pa kuno to ang akong Covid-19 ba kay wala man moubos ang akong oxygen levels. Apan dako na gani kog gasto diha lang nag-isolate sa balay. Samot pa kahag niubos ang oxygen ug gidala sa hospital.
Maka-imagine lang ko sa gibati niining mga gihulagway nga naglinya gawas sa mga hospital.
Permi ko nakiglalis sa asawa ug mga bata nga kinahanglang mogawas sa balay aron sa mga face-to-face nga mga meeting. Manginabuhi gani. Apan risgo kaayo kay mahurot ra ang imong tinigom kon mataptan na.
Dihang nataptan ko, nagpa-swab mi tanan sa balay lakip na ang among mga empleyado. Nagpa-disinfect pa gyud. Dalia gyud hinuon nahurot sa halin sa among Hiace nga gibaligya.
Sa usa ka bulan nga naa ra ko sa balay, naguba gyud ang among household nga ekonomiya.
Pagkaayo nako, naniguro dayon ko nga mabakunahan. Makapabalaka gihapon kay matakdan man gihapon, hinuon dili grabi ang simtomas, sa nabakunahan. Apan kuyaw nga ang wala pa mabakunahi sa pamilya ang matakdan.
Way lockdown?
Alang kanako, dili makapahunong sa Covid-19 ang lockdown labi na kon hinanggaw sab ang implementasyon. Ang lockdown dunganan sab og mga ayuda nga way dapigdapig ang pag-apod-apod. Dayon, buhaton ang mga contact-tracing ug testing.
Dayon, pahingusgan nato ang pagpamakuna. Importante alang sa ekonomiya labi na sa turismo nga masaligan nga luwas sa Covid-19 ang usa ka lugar.
Kon wala kining dugang mga buluhaton sa kagamhanan, modaghan gyud ang mga kaso sa Covid-19. Ma-kontrol man ang mga balita. Apan mapugngan ba ang mga istorya sa mga paryente ug matag komunidad nga dunay nangasakit ug nangamatay? (DM nako @anol_cebu)