SECTIONS
Superbalita Cebu
Tuesday, September 21, 2021
SUPERBALITA CEBU

Espinoza: Balik ta sa uno

Nagpakabana

Midagsang ang daghang tawo nga magpabakuna tungod sa pag-abot dinhi atong probinsya, lungsod ug mga dakbayan ang giingon nga Delta variant sa Covid-19. Niadtong Biyernes kapin libo ang nagpabakuna sa Dakbayan sa Mandaue. Ang problema sa uban nga dapit kay kuwang ang bakuna. Gani, kadaghanan sa nagpabakuna wa na magpili sa klase sa bakuna.

Apan subo ug sakit paminawon nga sa miaging nga mga semana ug buwan ang atong probinsya, Cebu, ubos kaayo ang mga kaso sa Covid-19. Apan karon, matod sa DOH Central Visayas Covid-19 Case Bulletin No. 409, Aug.1, miabot na sa 3,037 ang aktibo nga kaso sa coronavirus. Diin man dapit nasipyat o nagkuwang ang atong kagamhanan sa probinsya, mga dakbayan, ug kalungsoran?

Sa Hulyo 15, 2021, ang Probinsya sa Negros Oriental ang nag-una sa gidaghananon sa aktibo nga kaso sa Covid-19 nga miabot sa 3,464 samtang ang Cebu dunay 929 lang nga kaso ug ang Bohol 2,050. Alang kanako way lain mabasol kon di ang kadaghanan sa mga katawhan nga kumpiyansa na kay nabakunahan na ug mga gahi’g ulo nga di na motuman sa mga health protocols sama sa husto nga pagsul-ob sa mask, face shield, ug paglikay sa tapok-pundok.

Di kalikayan nga ato usab nga mabasol ang mga lokal nga kagamhanan ug kapulisan tungod sa paglugak sa pagpatuman sa mga health protocols. Pila ka higayon nga makasunod ko og mga sakyanan nga puno kaayo, sikit og lingkod ug nagsabak pa unya ang kadaghanan walay facemask. Kon naa man, kutob ra suwang. Daghan ang grupo o pamilya nga maligo sa dagat matag Dominggo, nga wala na magtuman sa physical distancing.

Sa public markets, ang mga tindera morag gisakitan sa ngipon kay naa ra sa suwang ang ilang mask. Kon imong silang badlongon ikaw pa ang dautan ug asyos. Karon nga misaka og balik ang kaso sa Covid-19 ug kining giingon nga Delta variant nga mas grabe ang takod, giestrikto na sad og balik sa atong kagamhanan ug kapulisan samtang karong nagkapuliki na ang mga doctor ug nurse sa mga hospital tungod sa kadaghan sa naigo sa coronavirus.

Gani, ang mga hospital diri sa dakbayan sa Sugbo ug Mandaue puno na ang giandam nga kwarto alang sa pasyente sa Covid-19. Naay hulagway nga gipagawas sa social media, nga naa na lang sulod sa ilang awto ang mga pasyente, nga gihatagan og oxygen.

Ang paglikay nga matakdan ta aning makamatay nga virus o bisan unsa nga klase nga sakit usa ka personal nga hiyas. Di na man gani mistil nga mandaran pa ta sa kagamhanan sa angay ta nga buhaton tungod kay nag-amping man ta sa atong panglawas. Hinuon, di kalikayan nga naay mga tawo nga hangtod karon di motuo aning Covid-19 ug di magpabakuna kay mas mituo sila sa kinuwanggol nga estorya kay sa siyensya.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph