Sayon kaayo ninyo morekomendar og lockdown. Nakakita na man ta, gibuhat ta na man na, unya, nahunong ang Covid? Nag-ECQ bitaw ta, unya, na-zero Covid ta? Lockdown doesn’t work well, they work against the economy. Ang ekonomiya ang maguba unya ang labing mag-antos ang mga kabus.” Mao kini ang pintok nga pamahayag ni Cebu Governor Gwen Garcia nunot sa pagpa-ubos sa tibuok isla sa Sugbo sa modified enhanced community quarantine (MECQ).
Apan ambot og unsay nakaon sa taga IATF nga nausab man ang ilang baruganan. Gipaubos na man lang sa general community quarantine (GCQ) ang Cebu province hangtod sa Agusto 15. Maayo kay ilang gipaminaw ang apelasyon sa Provincial Government. Kon ilang gipaminaw ang Provincial Government, ang Cebu City? Nasayop ba ang IATF sa ilang unang desisyon kay ila mang giusab? Samtang ang mga dakbayan sa Sugbo, Mandaue ug Lapu-Lapu gipabilin gihapon sa MECQ. Ning higayona, nagkara-kara ang mga lider sa Sugbo sa pagsugod sa ikaduhang hugna sa atong pagbalik sa mas hugot nga kalagdaan sa kwarentinas.
Samtang dili na kini bag-o alang kanato kay niagi na man kita niini sa miaging tuig, apan ang pagka-dili matagna ning maong gikalisangan nga variant sa kagaw maoy angay mopapas sa mga pag-ukon-ukon ug pagpanagana sa paghimo sa mas dinalian ug mas bug-at nga mga restrictions. Sa mosunod nga duha ka mga semana, ato unang ipadaplin ang pagpatugbaw sa mga katungod nga maligsan. Kinahanglan adto nato itutok ang atong panan-aw anang pulong kaluwasan o “safety.” Kana ang labing dinaliang butang nga buhaton karon. Kay matod ni kanhi U.S. President John F. Kennedy: “Our rights are not absolute. Our rights can be curtailed in the interest of public safety.”
Apan base sa duha ka adlaw nga MECQ, morag wala man kaayoy kausaban. Bukas gihapon ang pipila ka mga establisemento. Naa gihapoy public transportation. Hinuon, makita na nato ang police checkpoints sa nagkalain-laing lugar aron mosita sa mga tawo nga naglaroy-laroy. Dili sama sa MECQ sa miaging tuig nga estrikto kaayo ang mga lagda ug adunay quarantine pass ang mga gustong mogawas. Morag hilaw nga MECQ man. (bobbygnalzaro@gmail.com)