SUPERBALITA CEBU

Editoryal: Motuo’g ungo, di Covid

Editorial Cartoon by Ariel Itumay

Grabe ang linya sa mga pasyente gawas sa usa ka pribadong tambalanan sa Dakbayan sa Sugbo sa Dominggo sa gabii, Agusto 1. Labing minos 30 ka mga pasyente ang naghuwat sa gawas sa ospital, ang uban naa sa ilang tagsa ka sakyanan kay wa nay magamit nga ambulansya.

Sa hulagway nga kuha ni SunStar photographer Amper Campaña, matag sakyanan gibutangan sa kilid og mga oxygen tank. Ang uban kanila mga duha ka adlaw nang naa sa gawas naghuwat kanus-a sa makasulod sa tambalanan.

Di tanan taga Dakbayan sa Sugbo. Dunay uban nga naa na dinhi nidangop kay kuno puno na ang ubang mga ospital sa Sugbo.

Sa datos sa Emergency Operations Center (EOC), duha ka mga tambalanan naa na sa kritikal nga sitwasyon kay 90 porsyento na silang puno. Laing duha taas og risgo. Kini nga mga tambalanan tipik sa 15 ka mga ospital sa siyudad,

Ang talan-awon sama sa nahitabo sa unang wave sa coronavirus disease 2019 (Covid-19) sa 2020. Apan mas angay tang mabalaka aning virus karon kay kon mao na kini ang Delta variant sa Sars-CoV-2, namatud-an na kon unsa kini ka paspas nga manakod ug unsa ka isog ang kini nga mutation sa kagaw sa Sars.

Apan makaguol tan-awon karon nga unta ubos na ang tulo ka mga siyudad sa modified enhanced community quarantine (MECQ), ang mga kalihukan sa katawhan wa mausab, maora lang og naa gihapon sa modified general community quarantine.

Gatusan gihapon ang masikop sa mga awtoridad tungod sa paglapas sa mga health protocol ug curfew. Kana nagpasabot nga ang katawhan kompyansa gihapon kaayo. Sama sa way Covid.

Mas makalilisang huna-hunaon nga sa kadaghan na sa nangasakit ug sa nangamatay, naa gihapoy di motuo kay lagi kuno mugna sa media ug gobyerno nga gustong makakuwarta.

Di pa gihapon motuo og Covid-19, apan motuo nga dunay abat ug ungo nga naa lang sa salida makita ug mabasa sa libro kay mugna sa imahinasyon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph