Ingon sa nag-inilugay ang mga kabanay sa mga pasyenteng naglisod sa pagginhawa sa pagpalit sa mga tangke sa mga oxygen nga gibaligya sa usa ka pharmacy sa Lunes sa buntag, Agusto 2, 2021, dan B. Rodriguez, Dakbayan sa Sugbo.
Dali nga nakalinya ang mga tawo sa pharmacy nga nahimutang atbang sa Vicente Sotto Memorial Medical Center (VSMMC).
Ang uban dunay nipalit og sobra sa usa ka oxygen tank.
Ang uban wala na magsalig sa mga tambalanan, nag-andam na daan.
Si Kevin (wa mohatag sa iyang apelyedo), usa sa mga staff sa SJ Sanjo Pharmacy nga nahinabi sa Superbalita Cebu, nagkanayon nga alas 7 sa buntag, naglinya na ang ilang mga kustomer nga mopalit sa oxygen tank.
Ang supply nila nga 70 ka oxygen tank naabot alas 10 sa buntag nagkuwang tungod sa kadaghan sa namalit.
Giawhag nila ang ubang mga kustomer nga mobalik nalang sa sunod adlaw, o sayo sa buntag sa Martes.
Ang ilang mga kustomer nagsagol gikan sa laing mga lugar sa Sugbo.
Usa ka kustomer nga taga Talisay nga wa magpahingan sayo sab nga nilinya sa pharmacy aron makapalit sa mas bararo nga presyo sa oxygen tank.
Ang bag-o nga oxygen tank nga 40 pounds P8,950 ang presyo samtang ang refill mobalor lang og P650. Samtang ang 20 pounds nga tangke dunay presyo nga P5,950, samtang ang refill mobalor og P450.