NAPAKYAS si Nesthy Petecio sa paghatag sa Pilipinas sa unang Olympics gold medal sa boxing human kini napukan pinaagi sa unanimous decision batok ni Sena Irie sa Japan sa nagpadayon nga Tokyo Olympics, Martes, Agusto 3.
Si Petecio kinsa misaka sa ring nga inilog mipakita sa tanan niyang abilidad apan wa pa kini mapaigo aron mabira ang gold sa women's featherweight class.
Hinuon makiangayon ang maong desisyon sanglit nagpakita man sa iyang kaagresibo si Irie nga tatawng nadasig sa abiba sulod sa Kokugikan Arena.
Kadto maoy ikatulong kapildihan ni Petecio sa mga kamot ni Sena sa upat nilang panagsangka sukad niadtong 2019.
Taliwala sa kapildihan, ang 29 anyos nga taga Davao del Sur nakakulit og pangalan sa torneyo sa dihang iyang gipangpildi ang mga inilang boksidor sa iyang timbng nga naglakip sa top-ranked nga si Lin Yu-Ting sa Chinese Taipei ug sa Europian champion Irma Testa sa Italy nga maoy naghatod kaniya sa gold medal round.
Apan ang pagkapildi ni Petecio, wa gihapon makapapas sa maayong performance ug sa paglaom sa Pilipinas nga sa unang higayon makapupo og gold medal sa boxing Olympics.
Kini gumikan kay sa sayo pa, si Carlo Paalam nakalabni usab og surprisang kadaugan batok sa Olympic, world ug Asian champion nga si Shakhabidin Zoirov sa Uzbekistan aron pagtungtong usab sa semifinals round sa flyweight class.
Ang referee napugos sa pag-undang sa away sa 1:44 segundos sa second round human kini nagpakong nga nakabaton sila og tagsatagsa ka mga gisi.
Sa pag-undang sa away, ang lumad nga taga Cagayan de Oro nga usa ka basurero nag-una sa scorecards sa upat ka mga judges samtang usa lang ang mitali pabor sa kontra.
"Magaling din po ‘yung kalaban ko eh, may experience din talaga," paghulagway ni Paalam ngadto sa 28-anyos nga multi-titled Uzbek."Sabi nga nila 50/50 daw, pero nagbigay lang ako ng tiwala sa sarili ko, at nakinig ako sa mga coaches ko."
Sa kadaugan, nakasiguro na og upat ka medal ang Pilipinas nga maoy pinakadaghan nga nakuha sa nasod sa matag Olympics.
Si Eumir Marcial, sa niaging adlaw, nagkinahanglan lang og dos minutos aron idespitsar ang Armenian nga si Arman Darchinyan aron paglabnot og lingkuranan alang sa semifinals round. (JBM)