DIHANG nasungkit ni Hidilyn Diaz ang unang bulawang medalya sa Olympics, nagmaya kitang mga Pilipino.
Gikan sa mga taas nga opisyal sa gobyerno ngadto na sa sama nako nga yanong tawo, mipadayag sa ilang pagtimbaya ni Hidilyn.
Isip usa sa mga nalipay, ako usab ipadayag ang akong pagtimbaya ug pasalamat ni Hidilyn sa iyang gihatag nga dungog sa nasud.
Gawas kang Hidilyn, ako usab gipasalamatan ang kasamtangan nga administrasyong Duterte, ilabi na ang akong mga suod nga higala sa Philippine Sports Commission, sama ni Commissioner Charles Raymund Maxey nga kanhi kauban nako sa SunStar Davao.
Ang PSC, kaabag ang uban nga stakeholders, dunay dakong papel sa kadaugan sa atong mga atletang Pinoy. Busa, angayan sila sa atong pasalamat, mga amiga ug amigo. |
Pinaagi nila, kinsa instrumento sa kamugnaan sa National Academy of Sports (NAS), taas ang akong kompiyansa nga daghang maumol nga mga maayong atleta sa nasud.
Usa sa mga opisyales sa gobyerno, Senador Win Gatchalian, nagkanayon nga ang NAS maoy sinugdanan sa daghang mga atleta nga mosunod sa tunob ni Hidilyn, ang unang Pilipino nga nakasungkit og bulawang medalya sa Olympics.
Namugna ang National Academy of Sports human nahimong balaod ang Republic Act 11470 niadtong milabay nga tuig.
Bisan aminado si Gatchalian nga kinahanglan sa mga atleta sa nasud ang mas lapad pa nga suporta, giila niya ang papel sa NAS aron makabaton og gitawag nga institutionalized government support alang sa sunod nga henerasyon sa mga atletang Pilipino.
Ilawom sa maong balaod, maghatag ang NAS og dekalidad nga edukasyon sa high school, diin nahilakip niini ang curriculum nga alang sa sports.
Ang dekalidad nga edukasyon nga madawat sa mga estudyante sa NAS maoy mahimong dalan aron magmalampuson sila sa ilang sports o sa mapili nilang propesyon o karera.
Full scholarships ang ihatag sa NAS sa mga natural-born Filipino citizens nga dunay potensiyal alang sa sports.
Giduso sab sa maong balaod ang pagpabarog og mga regional high school alang sa sports nga pundohan sa nasyonal nga gobyerno, butang makatabang sa mga batang atleta gikan sa nagkadaiyang dapit sa nasud.
Ang main campus sa NAS makita sa New Clark City Sports Complex sa Capas, Tarlac.
***
Pagtimbaya
Akong itimbaya ang atong mga suki nga tigbasa nga sila Manny Quinco, Neil Quinco, ug Joebert Catamco nga mga tagdumala sa HRZM Computer Services sa Padre Paura street kanto Roxas Avenue, Davao City.