DAVAO DE ORO -- Kantidad sa P1.9 milyon nga patrol car ang gitunol sa lokal nga panggamhanan ngadto sa kapulisan sa Nabunturan Municipal Police Station (MPS) Lunes sa buntag, Agosto 1.
Gibutyag nga usa ka bag-ong Hino Police Mobile Patrol car ang nadawat sa Nabunturan MPS ubos sa pamunoan ni Police Major Jesser I. Vagilidad IV, chief of police.
Matud pa nga personal nga gitunol ni Mayor Chickay Amatong sa lungsod ang sakyanan kung diin ang badyet niini gikuha gikan sa panudlanan sa lokal nga panggamhanan sa lungsod.
Malaumon si Amatong nga ang bag-ong patrol car dako'g matabang nga mapakusgan ang paghatag og serbisyo sa kapulisan ug mapadali ang pagresponde sa panahon nga dunay panginahanglan ang katawhan sa lungsod. (Dexter T. Visitacion)