MINGHOY karon sa selda sa Panabo City Police Station ang duha ka mga lalaki nga gituohang drug pusher human nasikop atol sa buy-bust operation sa awtoridad.
Ang mga dinakpan giila sa kapulisan nga sila Roy, 40-anyos, alyas Poloy ug Ranulfo, 35-anyos, alyas Ron.
Human nadawat sa kapulisan ang impormasyon sa ilegal nga pagpamaligya og shabu sa mga nahisgutan, gilayong miporma og team ang sakop sa Philippine Drug Enforcement Agency (PDEA) Davao del Norte ug ang Panabo PNP.
Dihang positibo nga mobaligya ang mga suspek, gilayong gihimo ang buy-bust ug malampusong naposasan ang duruha.
Nakuha sa ilang posisyon ang P7.8 milyon nga kantidad sa ilegal nga druga ala 1 sa hapon sa Purok Tambis, Barangay Cagangohan, Panabo City.
Kasong paglapas sa Republic Act 9165, kun Comprehensive Dangerous Drug Act of 2002, ang atubangon sa mga dinakpan didto sa korte. (Jeepy P. Compio)