GIKALIPAY og dako sa mga edaran sa Davao City human gipaningkamutan sa lokal nga kagamhanan sa siyudad ang mobile anti-Covid vaccination aron nga dili na makaadto sa mga vaccination sites.
Gibutyag ni Davao City Mayor Sara Duterte nga rumbuhon sa maong mobile vaccination mao ang mga lugar sa Davao nga dunay daghang ihap sa mga edaran.
"Sila na ang adtuon sa bakuna ug dili na sila ang molakaw ug mangita para asa magpabakuna, tumong nato niini nga mas daghan pang mga senior citizen ang mabakunahan," sumala ni Mayor Sara atol sa radio program niini sa Davao City Disaster Radio.
Subay sa talaan, anaa pa lang sa 76,472 ka mga senior citizens ang nakadawat sa ilang 1st dose, layo ra sa target nga 200,000 hangtud 300,000 base sa record sa City Social Welfare and Development Office butang nga gikabalaka sa mayor.
Sa datus, sagad mga senior citizen ang nangamatay gumikan sa komplikasyon sa Covid-19 maong nagmando ang mayor nga mas hatagan gayod og prayoridad ang mga edaran. (Jeepy P. Compio)