SUPERBALITA DAVAO

Covid-19 isipon na nga delta

TANANG mga bag-ong kaso sa Covid-19 sa tibuok nasud tratuhon na isip Delta variant.

Kini ang pahimangno sa Department of Health (DOH) ngadto sa tanang local government units atol sa pinakaulahing webinar na gipahigayon niadtong Hulyo 30.

Subay sa maong pahimangno, kinahanglan ang gilayong pag-test sa pasyente kon ugaling duna kini mga sintomas ug dili na maghulat pa og lima ka adlaw sama sa naandan.

Samtang kadtong mga walay sintomas mahimong ipailawom sa reverse transcription polymerase chain reaction (RT-PCR) test sa ikalimang adlaw niini sa pagka-expose sa kompirmadong positibo sa Covid-19.

Alang sa mga nagbiyahe gikan sa laing nasud nga dunay taas nga kaso sa Covid-19, mamahimong buhaton and RT-PCR test sa ikapitong adlaw gikan sa pag-abot niini sa Pilipinas. Kinahanglan usab silang i-quarantine sa facility sulod sa napulo ka adlaw ug upat ka adlaw nga home quarantine kon wala kini sintomas.

Bisan kadtong mga biyahero nga fully vaccinated na ug gikan sa mga non-high risk nga mga nasud, gikinahanglan lamang gihapon ikwarantina sulod sa pito ka adlaw. Kinahanglan usab nilang ipakita ilang vaccine certificate. Ipaubos usab sila sa RT-PCR test sa ikalimang adlaw sa ilang pag-abot sa Pilipinas.

Girekomenda usab ang paggamit sa KN95 nga face mask alang sa mga health workers samtang sa gagamit ug cloth masks, girekomendang doblehan kini og surgical mask aron mas maprotektahan ang katawhan batok sa mas makatakod nga Delta variant sa Covid-19.

Gipahimangnoan gihapon ang tanang katawhan sa istriktong pagsunod sa health protocols sama sa paghugas sa kamot, pagpalayo og dos metros sa ubang tawo, paggamit sa face mask ug face shield, ug pagpabakuna sa mas daling higayon.

Sa pinakaulahing datos gikan sa DOH niadtong Hulyo 28, duna nay 216 ka kompirmadong kaso sa Delta variant sa tibuok nasud diin walo niini ang namatay ug 192 na ang nakarekober.

Dinhi sa Davao Region, duna nay natalang upat ka kompirmadong kaso sa Delta variant diin tulo niini gikan sa Davao City samtang usa gikan sa Davao del Norte. (Uban sa taho sa CIO-Mati)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph