Balay-Balay, Tubig-Tubig: Digital trafficking

Sumala sa United Nations (UN), ang human trafficking usa ka akto sa pag-ilad o pagpugos sa tawo aron ma-recruit, mabalhin, o mapalarga aron makakwarta ang mga mapanghimuslanon.

Bisan kinsa mahimong biktima ini- lalaki, babaye, o mga bata- labaw na katong mga tawo nga nag-antos sa kalisod. Ang mga biktima mahimong makasinati og deprensya sa pangisip sama sa depression, anxiety, post-traumatic stress disorder (PTSD).

Labing luoy ang mga batang gihimong biktima sa trafficking tungod sa ilang kahuyang labaw na kon dad-on sila sa mga lugar nga wa pa nila ilhi ug malayo sa ilang mga pamilya.

Sa maong mga sitwasyon, mas kontrolado sa mga akusado ang maong mga bata.

Pipila sa mga hinungdan ngano nagpadayon ang trafficking mao ang kakabus, mga krisis sama sa katalagman, kapakyas sa paghuman og eskwela, kahuyang sa balaod, ug uban pa.

Gihimo sab kining negosyo pinaagi sa pagpaubos sa mga gibiktima sa pugos nga pagpanrabaho, paghimo og krimen, sekswal nga pagpangabuso, ug pagbaligya sa mga parte sa lawas.

Samtang padayon kita sa pagkumbati sa mga epekto sa pandemiya nga milanat na og kapin usa ka tuig, dili malimod nga daghang pamilyang naglisod karong mga panahuna tungod sa kawad-on og trabaho ug mga kahigayunan nga makatabang unta sa pagbuhi sa pamilya.

Mao sab kini ang hinungdan ngano dunay ubang pamilya nga mitugot nga mahimong biktima ang ilang bata sa online sexual exploitation of children (OSEC).

Kining problema sa OSEC dili lang nasinati sa Pilipinas. Matod pa sa United Nations Office on Drugs and Crime (UNODC) subay sa ilang Global Report on Trafficking in Persons sa miaging tuig, anaa sa trayntay tres (33%) porsyento sa mga biktima sa trafficking mga menor de edad.

Kasagaran sa mga biktima nakasinati og sekswal nga pagpanghimulos ilabi na ang pagbiktima kanila pinaagi sa paggamit og Internet.

Nailhan ang Pilipinas subay sa nagkalain-laing reports nga usa sa dakong tinubdan sa pagpanghimulos sa mga bata alang sa mga langyaw nga kliyente. Ang nakapait mao nga ang mitabang sa pagpamiktima mga paryente o ginikanan sa mga bata mismo.

Aron maresulbad ang suliran sa OSEC sa atong nasod, kinahanglan gayod nga magkaiusa ang mga nagkadaiyang sektor sa katilangban aron malikayan ang pagpangabuso sa mga bata.

Angay hibaw-on ang mga balaodnon nga gipasar sa Kongreso pag-amyenda sa kasamtangang balaod batok trafficking. Kinahanglan sab nga magmatngon ang mga molupyo sa matag komunidad sa mga posibleng insidente sa trafficking ug isumbong kini sa otoridad.

Gawas sa gobyerno, dako pod ang papel sa pribadong sektor labaw na ang nagdumala sa internet nga mamonitor ang mga lakang sa mga trafficker.

Padayon sab ang Children’s Legal Bureau sa pagtubag sa hagit sa pagsugpo niining maong krimen pinaagi sa mga advocacy activities, trainings, ug pagtabang sa mga trafficking survivors pinaagi sa paggunit sa ilang mga kaso ug pagtabang nga maka-recover human sa pait nga kasinatian.

Anaa gihapon pod ang Children’s Legal Assistance Form nga mahimong gamiton aron magpakonsulta. Makita kini sa Facebook page sa CLB.

Sa pagsaulog sa World Day Against Trafficking (WDAT) niadtong Hulyo 30, nagpabilin gihapong damgo ang hingpit nga pagkawala sa krimen nga trafficking. Mao nga magtinabangay kita aron wala nay bata nga mabiktima sa trafficking sa umaabot.

[Lindog sinuwat ni Atty. King Anthony Perez, usa sa mga abogado sa CLB, inubana sa mga AHRC intern nga silang Eryl Amrhein Agustin ug Janine Oliva. Mahimo kamo nga mupadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph