Luoy tan-awon ang mga pasyente sa Covid-19 sa Cebu City ug Cebu Province nga naa intawon sa sidewalk gawas sa ospital ug ang uban naa sa sud sa sakyanan nagbutang og oxygen.
Mibati ko ug kabalaka nga mograbi kon molugak ang mga opisyal sa sitwasyon tungod sa kaso sa Delta variant nga mitumaw karon.
Gikuyawan ko sa nahitabo sa India nga wa nay kabutangan sa mga patayng lawas ug gisunog na lang. Ang ubang nasud mipatuman sa lockdown ug nigamay ang mga nahimong positive. Dali sab nakabalik ang pag-abli sa ekonomiya.
PULITIKA
Sa akong tan-aw, kadudahan ang kalit nga pagtumaw ug pagpasangil ni Regie Ornopia nga gigamit ni Tabogon Mayor Dodong Duterte ang resources sa gobyerno sa negusyo niini.
Kon tinuod nga nahitabo kini mga lima na ka tuig ang milabay, nganong karon pa man nagpakita ug mipasangil si Ornopia nga mibukal na ang kaldero sa pulitika alang sa 2022 election?
Hinuon, di naman kini bag-o kon pultika ang hisgutan. Ang mga pasangil motumaw gayud batok sa mga pulitiko
Atol sa interview sa media gihimakak ni Duterte ang pasangil ug nahibulong sa pasangil ni Ornopia kay dugay naman Kini ana sila magkita isip iyang extra driver.
Si Duterte, nga anaa sa katapusang termino ug mopuli ang sawa niini nga konsehal alang sa pagka mayor kontra ni Konsehal Francis Salimbangon.
PACQUIAO
Mitumaw ang kainit sa away sa PDP Laban faction ni Presidente Rodrigo Duterte ug Cusi ug Senador Manny Pacquiao ug Koko Pimentel group.
Natangtang gud si Pacquiao sa pagka presidente sa PDP kay gikuha sa kampo ni Duterte-Cusi nga niresulta sa pagpasaka og kaso sa kampo nila ni Pimentel.
Si Pacquiao gibutang ni Pimentel isip presidente. Samtang si Duterte, igo lang mikabayo sa PDP sa pagdagan niini sa pagka presidente sa tuig 2016.
Ug ang amahan ni Koko nga si kanhi senador Nene Pimentel maoy nag-amuma sa PDP sa dugay ng panahon.
Bisan pa niini, maayo unta ug magkahiusa ang katawhan sa pagsuporta ni Pacquiao ug molampos sa away batok ni Errol Spence Jr. karong Agusto 21. Email:efrenlonzon71@gmail.com / Text:09235563777