Delta variant na kaha sa coronavirus disease 2019 (Covid-19) ang miataki sa Sugbo? Kabalak-an ang nag-trending sa social media bahin sa hulagway sa nanaglumbay sa gawas sa ospital nga mga pasyente ug ang gikataho nga panic buying sa oxygen tanks aron pag-abag sa pagginhawa sa mga masakiton.
Hinuon, makapaluag sa dughan ang pamahayag ni Acting Mayor Michael Rama nga nagkanayon nga subay sa iyang pagsusi, ang kakuwang nga personel, labina sa mga doktor ug nurses, mao ang dakong hinungdan sa sitwasyon, dili ang kakuwang sa hospital beds alang sa Covid patients.
Duna pa untay Covid beds ang pipila ka mga tambalanan, matod ni Rama. Sa Cebu City, adunay 15 ka hospitals, 11 niini pribado, anaa pa lang sa 580 ang okupado gikan sa 1,023 ka beds nga gitagana sa Covid patients kun 56.7% occupancy rate. Medyo layo pa sa risgo nga lebel.
Apan matod ni Rama nga dili mapasudlan og pasyente sa Covid ang bakanteng higdaanan sanglit wa nay available nga medical personnel.
Matod ni Cebu City Councilor Joel Garganera, deputy chief implementer sa Emergency Operations Center (EOC), duha ka mga hospital ang nag-operate lapas na sa 90% sa ilang occupancy rate, tulo ang high risk, tulo ang moderate ug pito ang gikonsiderae nga safe o luwas pa nga lebel.
Gusto ni Rama nga mosulod na ang Department of Health (DOH) 7 aron mangita og health care worker sa ubang rehiyon kansang kaso sa Covid ubos aron motabang sa Cebu sama sa gibuhat niini sa Sugbo ngadto sa Manila dihang nidaghan og maayo ang ilang mga kaso.
Dugang sa acting mayor, andam mohatag og incentives ang City Hall.
Tinuod, kabalak-an ang sitwasyon. Apan dili usab angay hingpit sirad-an ang negusyo ug ubang kalihokan tungod sa tumang kabalaka. Ang ekonomiya nagdugo na pag-ayo. Nagtinga. Mopadayon kita ubos sa higpit nga protocol.