Inay RT-PCR test, rapid antigen test na unya ang ipagamit sa mga provincial ug district hospitals aron di na maghuwat pa og dugay sa resulta ang mga pasyente gawas sa hospital.
Kini maoy gipahibawo ni Cebu Governor Gwendolyn Garcia atol sa press conference sa Kapitolyo sa Agusto 2, 2021 human nikatap ang hulagway sa social media diin makita ang daghang mga pasyente nga naglinya gawas sa Provincial Hospital sa dakbayan sa Danao.
Gihulagway kini ni Garcia nga “mismanagement” ang pagdagsa sa mga pasyente sa dakbayan.
“Let me assure you, it was really mismanaged. Daghan paman unta og space nga kabutangan nila inside. But I guess you know usahay kani bang human nature nga mangita ka’s labing sayon...and this were actually waiting for test results. In fact, pagkagabii nga nigawas ang test results, gipapauli kay daghan man negative,”matod ni Garcia.
Tungod, niini gisugyot ni Garcia sa mga nangulo sa hospital sa pag-usab sa schedule sa duty sa nurses aron dili magkuwang ilabi na ning panahon nga padayon ang pagsaka sa mga kaso sa coronavirus disease (Covid-19).
“Chief man kaha mo, I am pressuming kamao mo mo-manage sa inyong hospitals. Bisan kanang scheduling sa mga nurses nato, you already know nga karon nagsige og saka ang atong cases. We need the nurses. So, usba na inyong scheduling, di kanang mo diretso og 48-hours mo day-off sad og 48 hours o di two days, wa nakay nurse...Naa man gud na sa management because the other provincial hospitals did not experience the same. Wa man na nahitabo,”matod ni Garcia.
Matod sa gobernador nga ang mga hospital sa Probinsya sa Sugbo adunay kinatibuk-an nga 426 ka available beds alang sa Covid-19 patients, hinungdan nga dili kinahanglan nga dawaton tanan sa Siyudad sa Danao ang tanan nga mga pasyente tungod aduna pa’y mga silingan nga hospitals nga mahimong kapasilongan sa mga pasyente.
“When I say we have 426 beds, combined na sa four pProvincial hospitals and 12 district hospitals which I as I reminded them again you can help each other. Parehas nimo Danao, daghan man og available sa Bogo, even Sogod, pero wa. Gi ako gyud na nimo tanan diha which created very bad optics.” (ANV)