MOABOT sa P245,000 ang danyos sa sunog sa Brgy Pajo, Dakbayan sa Lapu-Lapu sa Martes sa buntag, Agusto 3, 2021.
Ang alarma sa sunog nadawat sa Lapu-Lapu City Fire District alas 9:45 sa buntag nga daling gipaubos sa first alarm.
Alas 10:16 gideklarar kini nga under control.
Matod ni FO2 Jeffrey Gerodiaz, imbestigador sa sunog, nga base sa iyang inisyal nga imbestigasyon, nagsugod ang sunog sa lawak sa usa ka Princess Roberts.
Si Roberts nagtrabaho sa usa ka kan-anan sa dapit nga nalakip usab pagkasunog.
Ang nasunog giingong pulos mga lawak paabangan, moabot sa 10 ang naugdaw base sa inisyal nga datus sa kabomberohan.
Naugdaw usab ang usa ka kan-anan sa lugar.
Wa hinuoy nakalas sa sunog apan usa ka responder nga nailhang si Jerry Mañus nakuyapan atol sa pakigkombati sa kayo.
Dali siyang gipapahuway sa ambulansya ug giatiman sa kaubang mga responder.
Aduna usay mga usosero sa sunog nga gipangbadlong ug gipang-isyuhan og citation ticket sa kapulisan gumikan sa wala pagsul-ob og facemask.
“Kinahanglan pa gyud ta ani og lawom nga imbestigasyon sa cause kay base sa estorya ni Princess, wala man kuno siyay gibilin nga gi-charge, wala sad siya appliances kay bag-o ra siya balhin. Ang nakabantay nga naay kayo sa iya kwarto is ang adjacent niya nga kwarto,” matod ni Gerodiaz. (GCM)