Special Investigation Task Group (SITG) nga maoy nag imbestigar sa pagpusil patay sa radio blocktimer nga si Reynante Cortes sa gawas sa sibyaanan ni re-construct sa crime scene aron mahibaw-an kon asa posibleng nanukad ug unsay gilay-on sa nipusil kaniya.
Giangkon sa SITG nga blangko pa sila kon kinsa ang killer o mga killer.
Nihimo sila og reconstruction sa krimen aron ilang masayran diin posible nanukad gunman.
Nasuta na usab nga usa lang ka armas ang gigamit ug usa lang usab ka bala ang miigo sa lawas ni Cortes.
Apan adunay duha ka samad si Cortes tungod sa pagkatunga sa bala nga 5.56 milimeter nga maoy bala sa Armalite rifle.
“There is only one bullet shot and it was only nag split siya. Pagka igo niya sa bukton, nag split siya maong nag re-entry siya, duha na ka buok ang iyang trajectory sa bala. But it was confirmed by the ballistician nga it was only one bullet shot,” matod ni Police Lieutenant Colonel Wilbert Parilla sa Cebu City Police Office.
Dugang ni Parilla nga sa sunod nga SITG case conference dinhi mahibaw-an kung unsay gilay-on sa gun man kang Cortes pinaagi sa danyos sa lawas base sa resulta sa autopsy.
Ipasabot usab unya sa ballistician kon makita ba sa trajectory sa samad ni Cortes ang posibling nahimutangan sa nagpusil nga una nang gikalibgan sa mga imbestigador nga managlahi ang nahimutangan sa mga samad.
Samtang naghimo na usab silag association matrix ni Cortes diin naa didto ang mga higala ug mga nahimo niining kontra tungod sa iyang pagpangumentaryo sa radyo.
Gani naapil ang ngalan ni Lapu-lapu City Mayor Junard Ahong Chan sanglit nahimo man usab niya kining suod nga higala ug nakuhaan na usab nila kinig pamahayag. (AYB)