Dul-an sa 300 ka tawo nasikop sa kapulisan sa Siyudad sa Sugbo sud sa duha ka adlawng pagpa-ubos sa dakbayan sa Modified Enhance Community Quarantine (MECQ).
Si Police Lieutenant Colonel Wilbert Parilla, deputy city director for operations sa Cebu City Police Office mipahibawo nga sa kinatibuk-ang 270 nga nadakpan, 23 niini mga menor de edad, 205 ka tawo nga nakalapas sa curfew, 65 gidakop nga way facemask ug lima ang nasakpan nga nag- inom sa publikong lugar.
Mga sudlonon nga bahin sa kabarangayan maoy girumbo sa mga pulis uban sa mga tanodKon sa miaging mga adlaw sa mga kalsada nag-roving ang kapulisan, apan nimando si City Police chief P/Col. Josefino Ligan ngadto sa 11 ka mga police station nga sudlon na ang mga sitio sa kabarangayan.
Moabag sa pag-roving sa mga sudlonong bahin sa barangay mao ang mga sakop sa Philippine Army nga gi-augment gikan sa Central Command (Centcom) ug Taskforce Kasaligan.
Gihimo sab sa kapulisan ang rekorida aron sa pagpahinumdom sa publiko sa pagtamod sa minimum health standard ilabi na niining pagsaka sa mg kaso sa Covid sa dakbayan.
Samtang adunay mga jeepney ug bus drayber ang gipangbadlong tungod sa overloading.
Mipasidaan si Parilla nga sugod sa Agosto 4, 2021, ila nang panakpon ang mga pasahero ug drayber nga molapas niini base sa mando sa Emergency Operation Center (EOC) sa Cebu City government. (AYB)