GIKLARO sa lokal nga panggamhanan sa siyudad sa Davao nga wa kini magplano nga iimposar ang "no vaccination card, no entry" sa mga establisemento sa dakbayan.
Gihimakak ni Mayor Sara Duterte-Carpio niadtong Lunes, Agosto 2, ang mga taho nga ang lokal nga panggamhanan motugot lang sa mga nabakunahan na nga mga tawo nga mosulod sa pampubliko ug pribadong mga merkado sa dakbayan.
Kini human nga ang lokal nga panggamhanan sa Sugbo niisyu og executive order nga kadto lang mga nabakunahan nga mga tawo tugtan sa pagsulod sa pampubliko ug pribadong merkado, naglakip sa department stores, supermarkets, ug convenience stores sugod sa Agosto 25. Apan ang mando girebukar ni Lapu-Lapu Mayor Ahong Chan.
Gikanayon ni Duterte-Carpio nga ang siyudad di makaimposar sa maong polisiya kay gikonsidera niini nga daghang mga Dabawenyos ang wala pa hingpit nga mabakunahan.
"Because kulang pa ang atoang bakuna. The moment nga daghan ta og bakuna and wala nay gusto magpabakuna and wala ta makaabot sa 1.2 million, isa na siya sa possible options na buhaton sa isa ka LGU para ang mga tao is maengganyo magpabakuna," pagklaro sa mayor atol sa paghinabi kaniya sa 87.5 FM Davao City Disaster Radio.
Dugang pa niya nga, "Kulang ang atong bakuna, we cannot do that. Otherwise, mag-stampede ta tanan didto padulong sa vaccination center."
Gani si Covid-19 Task Force spokesperson Dr. Michelle Schlosser nagbutyag sa paghinabi sab sa radyo niadtong Miyerkules, Agosto 4, nga ang task force wala pa maghisgut kon ang siyudad mosagop sa maong paagi ug iyang gihimakak ang mga taho nga nagkatag sa online. (Uban sa taho sa SunStar Philippines)