Human nag-viral ang escabeche ug chicken cordon daghang memes ug mga Bisaya nga kanta ang nauso. Apan ang pinakanag-trending gyud sa tanan ang “Food Package” sa vlogger nga si Kabingka Jade nga sud lang sa usa ka adlaw naka-2.5 million views, 71k likes, ug 118k shares.
“Appear tayo/ kung mamakal gani mo/ siguroa jud daan fully paid na ba ang sud-an...” tipik sa iyang Bisaya version sa Spaghetti song sa Sexbomb.
“I wrote it mga 30 minutes. I usually compose songs kanang kaadlawon kay walay saba. Sometimes kon naa jud koy paghuhugutan makabuhat kog kanta in just 15 to 20 minutes. Pinakataas na nako ang 1 hour,” matod sa 26-anyos nga si Jade Estela sa tinuod nga kinabuhi sa Superbalita Laysho.
“I started vlogging in 2018 after nag-viral ang pinaka-una nakong kantang “Libakera” (Bisaya version sa `Havana’ by Camila Cabello) nga dunay 4.3 million views, 39k likes ug 48k shares. Pero ang pinakadaghan nakog hits ang “Ayaw Palabi” (`At My Worst’ by Pink Sweats) in January 2021, with 4.8 million views, 273k likes ug 124k shares.”
Lakip usab sa mga nag-viral ni Jade ang “Aso” (Usok by Asin), “Aykog Labda” (Kiss Me Kiss Me by Sarah Geronimo), “Kausaban” (Kapaligiran by Asin), ug “Salamat Amahan” (Dance With My Father by Luther Vandross) nga gipahinungod niya sa iyang amahan nga lead guitarist niadto sa banda sa wala pa ni ma-stroke.
Patok usab sa mga netizen ang iyang Bisaya version nga “Lisud Jud Ang Kaminyuon” (Marvin Gaye by Charlie Puth and Meghan Trainor) nga gikan diay sa iyang personal nga kasinatian.
“I got married with my long-time boyfriend in 2017. We’ve been together for 10 years but we broke up last year. We have two kids, a 9-year-old girl and an 8-year-old boy. I’m now single and ready to mingle hahaha,” paambit pa niya.
NGANONG KABINGKA?
“It all started kadtong nag-viral ang akong Libakera kay naa man gud toy lyrics nga `mosamot ra mog ka chaka maypa maghimo mog bingka’ and sukad ato kada gawas nako sa balay tawgon nako nila og bingka. Most of my gay friends tawag sad nila nako kay bingka or kabingka.”
“I can’t say nga singer jud ko kay di baya tawon ko ingon ana kamaayo basig malibakan ta’s ubang singer. Hahaha.. but I know how to sing and I know how to entertain people on stage.”
Apan si Jade nagkantahan na niadtong 2016 sa Southbridge Hotel sa Singapore. Duna sad siyay banda nga tigtukaran sa Enorms Balamban ug Nanay Babys Eatery sa Asturias apan kasamtangan lang ning nasira tungod sa hulga sa Delta Variant. Dako ang iyang pasalamat sa vlogging nga maoy naghatag niya og kinitaan ning panahon sa pandemya.
PRES. DUTERTE
“Nagsugod jud kog kantakanta sa mga singing contest. I became a singing champion at the age of 4. I sung `Lagkaw’. Then misud kog banda when I was 15. Pero kini akong paghimog mga cover song sa Bisaya ni-boom lang pag-2018 especially when I made a song for President Duterte which caught the attention of his PSG.”
“I got the chance to meet the President when he personally thanked me for my song about his fight on illegal drugs. Then some politicians nagpabuhat sad og political jingle mao naabot kog Manila ug Davao kay ako mismo ang ni-perform sa akong mga composition sa ilang campaign rally.”
Si Jade usab ang gipahimo ni OWWA deputy administrator Mocha Uson og jingle sa women’s empowerment niadtong Marso 2021 nga gisayaw sa mga OFW atol sa ilang event.
“Sa cellphone ra ko mag-record ug mag-edit with my condenser microphone and V8 soundcard.”
MGA TATTOO
Ang mga hugot ni Kabingka Jade sa kinabuhi makita usab sa iyang mga tattoo sama sa dakong krus sa tuo niyang pulso diin dunay nakasuwat “Trust, faith & believe.” Duna say angkla sa barko nga ang buot ipasabot niya pa, “I refuse to sink.”
Samtang sa iyang tuong braso ang “Fearless” nga naglarawan sa iyang mga pakigbisog sa kinabuhi. Sa wala niyang bukton ang “You keep me safe, I’ll keep you wild” ug “Keep moving on” nga nagpahinumdom niya nga bawal magtinapulan.
“Ang uban nakong tattoo naa sa bukobuko nga guitar ug musical notes. Ang pinaka-last is naa sa akong bat-ang nga pangan sa akong bana pero pagbuwag namo akong gipa-coveran og abstract tattoo. Ay jud mog tuga-tuga. Hahaha... And people might see me as siawan or buangon but mind you, I still have this beautiful heart even though it has been broken into thousands of pieces.”