PADAYON ang pagsaka sa ihap sa mga aktibo ug bag-ong mga kaso sa coronavirus disease (Covid-19) sa Cagayan de Oro.
Anaa na sa 1,805 ang aktibo nga mga kaso ug 121 ang mga natala nga mga bag-ong kaso sa dakbayan.
Sa 121 ka mga bag-ong kaso, 64 niini mga local index cases, 36 ang mga local cases with link, unom ang mga lokal nga authorized persons outside residence (Apors), siyam ang mga Apors with link, ug unom ang mga patay.
Miabot sa 13,111 ang kinatibuk-ang ihap sa mga kaso sa Covid-19 sa dakbayan.
Ang Cagayan de Oro adunay 1,805 ka mga active cases, 538 niini na-admit sa Northern Mindanao Medical Center ug uban pang mga ospital sa syudad, ug 1,267 ang mga outpatients.
Nakatala usab og 133 ka mga coronavirus-positive nga mga kaso nga karon naka-recover. Anaa na karon sa 10,740 ang ihap sa mga nakarekober nga mga kaso sa dakbayan.
Ang ihap sa mga namatay sa Covid-19 sa syudad anaa na sa 566.