Okay... sa makausa pa nahibalik na usab si Dwight Howard sa Los Angeles Lakers. Apan kini ubos lang sa minimum salary tungod kay dako man og napahak ang ilang salary cap sa dihang ilang nakuha si Russel Westbrook pinaagi sa trade.
Kini maoy ikatulong sunodsunod nga higayon nga ang beteranong si Howard makadawat og minimum nga suweldo lakip na sa 2019-20 season sa Lakers.
Human niadtong makapasagmuyo nga 2012-13 season sa Los Angeles, si Howard, 35, mitapon sa Houston Rockets apan lagi ka wa man makapakita og saktong labok, nibalik kini sa Lakers isip backup center diin niya nalangkat ang iyang unang kampyunato.
Daghan ang nagtuo nga magpabilin gihapon siya sa Lakers ilabi na kay mao kini iyang gi-post sa iyang Twitter account.
Pero sa kalit gipapas ang iyang gi-post ug mao na lay nahibaw-an sa Lakers nga didto na siya sa Philadelphia Sixers napunta ug nahimong backup ni Joel Embiid.
Karon nga nag-reunion na usab siya ug ang Lakers. Nanghinaot ang matag habig nga mausab nila ang ilang nahimo niadtong 2019-20 season.
Nabakante man gud ning sentro sa Lakers dihang nalakip si Montrezl Harrell sa ilang gihimong trade bugti ni Westbrook. Unya hapit na usab mo expire ang kontrata ni Andre Drummond, kinsa miabot sa Lakers sa tungatungang bahin sa niaging season.
Gawas ni Howard, mobalik usab ang laing beteranong si Trevor Ariza uban nila ni Wayne Ellington ug Kent Bazemore.
Kini si Ariza, 36, nakatabang ni sa pagkakampiyon sa Lakers niadtong 2009 kauban ni anhing Kobe Bryant ug Paul Gasol.
Si Ellington gikan na usab ni sa Lakers niadtong 2014-15 season ug sama kang Ariza three-pointer usab ni.
Si Bazemore nahimong Laker sa 2013-14 ug taas usab og porsiyento sa three-point land. Dala ni Marc Gasol, ang Los Angeles aduna nay walo ka mga players ug nagkinahanglan pa kini og laing pito.
Tungod sa gamay na lang nga nahabilin sa ilang salary cap, labing siguro mangita na lang ang Lakers ug players nga dili taas og kantidad apan kanang makahatag pa og saktong labok.
Sa uwahing kalambuan, nabira na sab nila ang laing beterano nga si Carmelo Anthony, suod nga higala ni James.
Minus man tuod og depensa apan dako siya og ikatabang sa opensa ilabi na sa outside area.
Nahatagan na gyud og katumanan ang pangandoy sa duha nga magkauban sa usa ka team human nga si Anthony miuyon sa usa ka tuig nga kontrata.
Sa 2013 NBA Draft, si James maoy no. 1 pick sa Cleveland samtang ang 37-anyos maoy ikatulo nga nahulbot sa Denver Nuggets.
Sa niaging season ubos sa Portland, si Anthony nag-average og 13.4 points ug 40.9% sa three-point land. Kon atong suhiron og maayo, ang Lakers mao na unyay usa sa labing edaran nga team sa NBA pero mga season ug sakto na sa kasinatian.
Kon sa manok pa, bintaha ang guwang kay maayo mosyapol unya taas og lahutay. We’ll, tan-awon nato ang ilang labok. (jun.migallen22@gmail.com)