Andam mopasaka og kaso ang kapulisan sa Siyudad sa Sugbo batok sa usa ka magsisibya nga unang ni-post sa iyang Facebook account nga nitaliwan na sa laing kalibutan si Cebu City Mayor Edgardo Labella tungod sa sakit sa cancer.
Kini human maong magsisibya padayong wala mangayo og pasaylo sa pamilya sa mayor ug publiko.
Dugang sa pag-monitor sa kapulisan, giingong dili motuo ang magsisibya kung dili niya kini makita ug siya mismo ang mokuha og hulagway sa sulod sa lawak sa tambalanan diin nasud ang mayor.
Sa milabayng semana, naukay ang mga Sugboanon sa dihang nigawas sa social media ang post sa usa ka magsisibya nga mitaliwan na sa laing kalibutan si Labella sulod sa tambalanan diin siya na-admit, matod pam tungod sa sakit sa cancer.
Dali kini nga gihimakak sa pamilya sa mayor.
Ni-post usab dayon kini sa iyang official Facebook page nga adunay isyu sa usa ka mantalaan nga nagpamatuod nga dakong buhi ang mayor.
Si Police Lieutenant Colonel Wilbert Parilla, deputy city director for operation sa Cebu City Police Office (CCPO), nagkanayon nga mahimong makasohan og cyber libel ang maong magsisibya kung moreklamo ang mayor ug ang pamilya niini.
Kung makahukom ang pamilya nga ilang pasakaan og kaso ang maong magsisibya, aduna na silay ebidensya niini sama sa screen shots sa post niini sa Facebook.
Mahimo ra kini nga magamit ug isuporta ang medical records sa mayor gikan sa tambalanan diin siya gi-admit nga buhi pa kini ug walay kamatuoran ang malisyusong post sa social media.
“Yes naa man tay daghang screen shots and even ang atoang city director naka dawat sad, pero depende sa action nga gustong nga buhaton ni mayor Labella ug sa iyahang pamilya,” matod ni Parilla.
Giklaro ni Parilla nga dali ra makakuhag mga ebidensya sa social media sanglit makita man kini nga maoy ilang ihatag ngadto sa korte.
Tungod niini, awhag sa kapulisan sa publiko nga dili magpatakag pakatap sa dili kompirmado nga impormasyon tungod kay mahimong makapasakaan kini og kaso tungod sa sayop nga impormasyon. (AYB)