BEA CHRISTINE L. SAAVEDRA
Jampang, Argao, Cebu
Buot kong mosakay
Sa gamayng balsa
Latas sa kabukiran
Diin ang matag witik sa pisi
Ngadto sa panit sa kabaw
Makahulip sa akong kamingaw.
Diin ang matag hagtok sa bato
Nga akong maagian sa dalan
Makatukbil sa akong galamhan.
Diin ang matag sagitsit
Sa mga dahon sa napir
Makapuli sa akong kasubo.
Diin ang matag sapigad sa hangin
Mobugnaw sa akong panit
Ug mohupay sa akong kasakit.
Ug kon ugaling lamang
Sa akong pagpauli
Duna nay aso sa abuhan
Ug nagbukal na ang kalderong
Buyukanan buot kong inadlawon
Ang paglatas sa bukid aron
Sa akong subling pagpauli
Masinati ko pag-usab
Ang yawyaw ni Nanay
Uban sa iyang hunsoy
Nga gisungsungag abo.