Balak: Sa imong pagsulod sa akong dughan

FAMILA N. JIMENEZ

Lindogon, Sibonga, Cebu

Tungod sa malimbation mong pahiyom

nakang-a ang pultahan ning akong dughan

nawalis ang mga bisagra nga maoy

hinungdan sa pagka-abli niini.

Yano ang imong pagsulod sa naabling

kasingkasing nga maoy naghatag kanako

og talagsaong pagbati human mo hakpa

ang tanang kahadlok ug pagduhaduha

nga mao unta ang mopalabong sa ulay

kong pagbati.

Apan ang panahon may dakong tahas

aron mangalarag ang nindot nga mga bulak

sa tanaman sa gugma dayon mangalaya.

Dili diay igo ang limbationg pahiyom

ug ang katam-is sa imong mga saad.

Labing bililhon ang hugot nga pagkalambigit

sa duha nato ka mga kasingkasing.