LAMBERTO G. CEBALLOS
Ilaya, Cawayan, Dalaguete, Cebu
Samtang nag-kape si Kevin didto sa sala karong hapuna nga nagtan-aw sa ikatulo nga duwa sa Alaska Aces ug San Miguel Beer sa ilang ‘best-of-seven series championship’ sa PBA, nakamatngon siya kang Tatay Estong niya nga misaka gikan sa banyo sa silong. Nasabtan ni Kevin nga bag-ong naligo ang iyang amahan.
“Ah, humota ni Tatay! May ‘date’ ngali!” ni Kevin dihang nahiagi si Estong sa sala.
Milingi si Estong kang Kevin ug mikilo. “At last, after two years, may uyab na ko!”
Duha na ka tuig nga nabiyudo si Estong sukad nipahulay sa dayon si Henya, inahan ni Kevin. Singkwentay singko na ang edad sa iyang amahan ug ania kini magpuyo sa ilang balay ni Josie dinhi sa dakbayan sa Mandaue. Didto sa ilang lungsod sa Sogod nag-inusara na lang si Estong sa ilang balay sukad namatay si Henya. Si Kevin ang nagsugyot kang Tatay niya nga anha na sa ilaha mopuyo. Duhay anak nilang Josie, pulos lalake. Si Julius, 9 anyos, grade 3; si Joshua, 7, grade 1. Tua karon sila sa eskuylahan. Si Josie maoy mohapit kanila gikan sa iyang gitrabahoan nga Mandaue Mall isip ‘sales supervisor.’ Dia si Kevin sa balay kay nag- sick leave.
“Kinsa diay imong deyt, Tay?” ni Kev.
“Si Ella. 57 siya ug balo pod sama nako. 3 months na mi nga textmate ug karon nagkasabot mi nga magkita personal sa Park Mall.”
Ning nangaging mga adlaw namatikdan sab ni Kevin nga nagpunay og dukdok sa iyang selpon si Tatay niya, kundili sa kusina, adto sa ‘terrace’. Dihay usa ka higayon nga nahibilin sa CR ang selpon ni Estong. Naatol nga nigamit si Kevin sa CR. Mitunog ang selpon. Gipunit ni Kevin ug gipislit ug gibasa ang mensahe, “Hello, ernie! Wat u doing? C ella ni!”
Nagpadayon pagtan-aw si Kevin sa duwa sa Alaska ug San Miguel. Taudtaod miagi sa sala si Estong nga esputing kaayo nga nagsul-ob og asul nga T-shirt ug maong jeans.
“Adto na ko, Kev,” pananghid ni Estong nga mingislit.
“Sige, Tay. Ayo-ayo. Basin karong pila ka adlaw duna na koy bag-ong nanay,” matod ni Kevin nga nagtingsi nga nangumedya sa iyang amahan.
Dihang nakalakaw na si Estong. Mitunog ang selpon ni Kevin. Si Josie ang nagtawag.
“Kev, mi-teks si Mama Basilia gikan sa Consolacion. Moanhi siya sa Mandaue aron pagbisita nato. Naa na siya diha?”
“Wa pa man,” ni Kevin. “Basin karong taudtaod. Huwaton lang nako. Uli lag sayo.”
DIDTO sa gawas sa Park Mall nagpaso-paso si Estong atubangan sa ‘main entrance.’ Gisuhid niya ang tanang mga babaye nga nagsul-ob og sinina nga pula. Wala siyay nakit-an. Unya may miduol kaniya nga babayeng tambukon nga nagsul-ob og sininang berde. “Uy, Pre Estong, kumusta ka?” matod sa babaye nga nagpahiyom.
Gitutokan ni Estong ang babaye ug miingon, “Mare Elyang, nia lagi ka?”
“Duna koy gihuwat, akong textmate. Magsul-ob kuno siyag T-shirt nga pula. Wa man!”
Nahitalunong si Estong. Maoy sabot nilang Ella nga siya (Estong) magsul-ob og pula nga T-shirt, ug si Ella magsul-ob og sininang pula pod.
“Ako sab naghuwat ko sa akong textmate kay mag-ila-ila mi sa personal. Pula pod iyang isul-ob nga sinina,” tug-an ni Estong. “Wa man motunga. Nangindiyan!”
Mitutok si Elyang kang Estong, “Ikaw si Ernie? Ako si Ella! Wa ko motuman sa atong sabot kon unsay isul-ob.”
“Ha?!” nakuratan si Estong. “Sus, Mare! Parehas diay ta, mga tikasan! Hahaha!”
Human magpig-itay sa kamot nanulod sila sa Jollibee aron mangaon og hamburger. Giingnan ni Elyang si Estong nga nag-teks siya kang Josie nga mobisita siya sa pamilya ni Kevin ug ni Josie. Gimingaw pod siya sa mga bata. Misugot pod si Elyang nga padayunon nila ang ilang pagka ‘textmate’ ni Estong. (KATAPUSAN)