Pormal nang gipadagan sa kagamhanan sa Dakbayan sa Lapu-Lapu ang mobile vaccine clinic kagahapon, Agusto 4, 2021.
Kini isip tubag sa mga yangongo sa pipila ka mga Oponganon nga mga senior citizen ug persons with disabilities (PWD) nga dili makahigayon pag-adto sa nagkadaiyang vaccination site sa dakbayan.
Ang mobile vaccine clinic iya sa Philippine Red Cross Lapu-Lapu-Cordova chapter ubos sa pakigtambayayong sa Kagamhanan sa Dakbayan sa Lapu-Lapu.
Abli ang clinic gikan sa alas 8 sa buntag hangtod sa alas 5 sa hapon ug maoy labing unang gawas sa National Capital Region (NCR), sumala pa ni Jay Gonzal, pangulo sa PCR Lapu-Lapu-Cordova Chapter.
Unang gibisita sa clinic ang Pajo nga usa sa mga barangay nga adunay na detect nga Delta variant.
Matod ni Lapu-Lapu City Mayor Junard Chan nga target sa clinic human sa Pajo ang laing siyam ka mga barangay ga aduna usay na detect nga Delta variant.
Moabot sa 300 ngadto sa 400 ka mga indibidwal ang mahimong matusokan kada adlaw sa naasoyng clinic, sumala ni Chan.
Priority niini ang mga senior citizen ug PWD, apan kon ugaling aduna pay sobra, mahimo kini nga ipaturok sa mga walk-in nga gusto magpabakuna o kadtong kapoyan na og adto sa ubang vaccination site sa dakbayan.
Ipahibawo lang unya sa Kagamhanan ang schedule sa pagbisita sa clinic sa matag barangay sa mosunod nga mga adlaw sa ilang Facebook page aron maghuwat na lang sila sa ilang higayon ug di na modumog pa sa ubang barangay. (GCM)