Nameligro nga maputol ang kontrata sa contractor nga maoy nagtrabaho aron maandam ang una hangtod ikatulong andana sa bag-ong Cebu City Medical Center (CCM) sa Lunes, Agusto 9, 2021.
Kini ang gipadayag ni Acting Mayor Michael Rama, kinsa nipahigayon og inspeksyon sa Miyerkules sa buntag, Agusto 4, 2021, sa nagpadayon nga pagtrabaho sa bag-ong tambalanan aron magamit sa mga tawo nga nataptan sa coronavirus disease (Covid)-19.
“If that will not be prepared by Monday, they should be ready to have their contract suspended or cancelled,” padayag ni Rama.
Si Rama nagkanayon nga makapasulod og di mominos 100 ka mga pasyente ang ospital kon mahimo nang operational ang tulo ka andana. Kasamtangan, ang out-patient department (OPD) maoy nag-okupar.
Si CCMC Hospital Administrator Yvonne Cania nagkanayon nga subay sa iyang pagkighinabi sa duha ka contractors, nipasalig kini nga ilang masunod ang marching order ni Rama. /PAC
“Kami sa among side ready gyud mi.Niingon ang mga contractor nga they are trying their best nga by next week mahuman na gyud nila (ang pagtrabaho sa tulo ka andana) ug ma-turnover (sa Cebu City Government),” padayag ni Cania.
Ang pangulo sa CCMC nagkanayon nga kon mahimo nang-operational ang tulo ka andana, ibalhin ang tanang pasyente sa bag-ong building.
Apan ipabilin sa temporaryong ospital nga nahimutang tupad sa BFP-7 ang kapin 30 ka Covid-19 positive nga severe o critical nga kondisyon. (PAC)