Duha ka managlahing mga aksidente sa dan sa managlahing mga dapit sa Sugbo ug oras sa Martes sa gabii, Agusto 3, nga naglambigit og mga trak, nikalas og mga kinabuhi ug nakabara sa trapiko.
Patay diha-diha ang Indian national ug iyang angkas nga babayeng menor human sila gidaro ug mangaligsi sa trailer truck alas 10:00 sa gabii sa Martes sa may N. Bacalso Avenue, Brgy. Lawaan 1, Dakbayan sa Talisay.
Giila sila nga si Hardeep Singh, 30, ulitawo, taga Barangay Linao, Dakbayan sa Talisay samtang ang iyang angkas mao si Jennifer Dacumos,17, taga Barangay Jaclupan, Talisay.
Si Police Corporal Jerryl Bulandres, imbestigador sa Traffic Police sa Talisay, nibutyag nga sila si Singh ug Dacumos ang mga gikan sa south nga bahin padulong sa norte. Posibling padulong na sila mopauli.
Sa pag-abot sa nahisgutang lugar, ang mga saksi niingon nga gidaro sa trailer truck nga gimaniho ni Anthony Llego Alvis, 45, taga Barangay Tinaan, dakbayan sa Naga sila si Singh ug Dacumos nga nag-angkasay sa motorsiklo.
Nalatayan si Singh sa trak samtang si Dacumos nalabay ug naligsan sa nagsunod nga 10-wheeler truck nga gimaniho ni Mofil Canape Pitogo, 30, taga Barangay Looc, Dakbayan sa Lapu-Lapu.
Sila si Alvis Pitogo gipangtanggong sa kapulisan samtang giandam ang kasong reckless imprudence resulting to homicide batok kanila.
Matod ni Bulandres nga nakugang na lang ang mga driver sa dagkong truck nga duna diay silay naligsan kay wa sila makabantay.
Si Joy Tumulak, pangu sa City of Talisay-Traffic Operations and Development Authority (CT-TODA) nga nahinabi sa Superbalita Cebu nagkanayon nga sa pag-abot sa iyang mga sakop sa dapit, mga saksi nibutyag nga dunay laing sakyanan nga nakasaghid sa mga biktima.
Nangalagpot ang duha ug nangaligsan sa managlahing sakyanan.
Wa nay mga traffic enforcer sa dapit gumikan kay alas 8 sa gabii ra kutob ang duty.
Wa say CCTV camera sa dapit nga makatabang unta sa pagsusi.
MIBABAG
Natumba ang usa ka trailer truck sa Maguikay flyover sa Dakbayan sa Mandaue human misaliring kay ang driver naninguha nga di mabangga sa usa ka sports utlity vehicle (SUV) nga gimaneho sa usa ka babayeng Korean national nga ni-counterflow alas 9 sa gabii, Agusto 3, 2021.
Nikabat ngadto sa siyam ka oras ang pagkuha sa Traffic Enforcement Agency of Mandaue (Team) sa truck nga natumba ug nibabag sa flyover.
Matod ni Police Lieutenant Colonel Mercy Villaro, tigpamaba sa Mandaue City Police Office (MCPO), nga sa ilang inisyal nga imbestigasyon, tulo ka sakyanan naglambigit sa insidente: SUV, trailer truck ug usa ka motorsiklo.
Giila ang driver sa trailer truck nga si James Lavador, 27, taga Campar, Danao City, amihanang Sugbo.
Ang driver sa SUV mao si Mikyong Choi, 42, usa ka Koraen national, taga TIB Mango Green Village, A.S. Fortuna St., Barangay Banilad, Mandaue City.
Ang nagmaneho sa motorsiklo mao si Fil John Herrera, 28, taga Poblacion, Occidental, Consolacion.
Matod ni Villaro nga si Lavador paingon sa norte samtang sila si Choi ug Herrera paingon sa dakbayan sa Sugbo.
Sa dihang paingon na modulhog si Lavador sa Maguikay flyover, nakita niya nga ni-counterflow si Choi.
Aron dili sila magbangga, niliko sa tuo si Lavador hinungdan nga natumba ang trailer truck ug natagak ang atubangan niini sa flyover.