Kon hilig ka sa pag post og estorya sa Facebook nga manaut sa bakuna batok Covid-19, undanga na.
Kon magpadayon ka niini, mag-atubang kag dakong problema kay dakpon ug imbestigahon ka sa kapulisan ug mapalgang sad-an, pasakaan og kaso.
Nikatap karon sa social media nga daghan na ang nangamatay tungod sa mga nabakunahan sa anti coronavirus disease 2019 (Covid-19).
Gawas niini, sila wala motuo nga adunay virus tungod kay kuno imbento lang kini sa gobyerno sa tibuok kalibutan.
Aduna pay mikatap nga video sa usa ka babaye nga bag-o lang nabakunahan nga nipilit ang kutsara sa iyang bukton nga nagpasabot, matod pa, nga puhaw ang sulod sa bakuna nga maoy makapatay sa tawo.
Ang impormasyon sa social media naka pabalaka sa daghang mga Pilipino nga daw sa mituo pa sila niini kay sa gipangsulti sa mga eksperto sa medisina.
Tungod niini, hepe sa Criminal Investigation and Detection Group (CIDG) Police Major General Albert Ignatius Ferro nibutyag nga mohimo silag imbestigasyon tungod kay way kamatuoran ang aligasyon sa mga tawo.
“Imbestigahan natin yung nagpapakalap ng fake news na yan,” matod ni Ferro.
Si Police Lieutenant Colonel Wilbert Parilla, deputy city director for operations sa Cebu City Police Office (CCPO), nagkanayon nga makig alayon sila sa CIDG-7 aron molusad silag cyber patrolling pag monitor sa mga netizen nga mag post sa Facebook nga walay basehanan.
Matod niya nga iresponsabli ang mag post sa social media sa way kamatuoran ug way basehanan nga ang anti Covid vaccine makamatay.
Makamugna na hinuon kini og kahadlok sa katawhan ug dili na hinuon magpabakuna.
Awhag ni Parilla sa publiko nga hunungon na ang paghatag og sayop nga impormasyon sa internet tungod kay ang kapulisan mo pasakag kaso kanila lakip na ang mo-share niini.
Gitinguha sa gobyerno nga 70 porsyento sa populasyon sa nasud mabakunahan na aron makab-ot ang herd immunity.
“Yes maka panic because the government is asking the public nga magpa vaccinate and then here comes naa say laing mga tawo nga gusto sad nga kontrahon ang mga report no nga gibuhat sa atong gobyerno,”matod ni Parilla.
Pasabot niya nga ang mga eksperto sa medisina sa tibuok kalibutan dili magpataka og himo og vaccine aron mamatay lang ang usa ka tawo.
Nanawagan ang kapulisan sa mga Sugboanon nga wala pa mabakunahi nga labing maayo nga makig alayon sa ilang mga barangay officials o magparehistro na aron mabakunahan.