SUPERBALITA CEBU

Editoryal: Ayaw pangangin

Editorial Cartoon by Ariel Itumay

Ang pagpabakuna di garantiya nga di ka na matakdan og coronavirus disease 2019 (Covid-19). Matakdan ka gihapon, apan matod sa mga eksperto nga di ka magrabehan gawas tingali kon duna ka nay daan nga grabeng sakit.

Mao bitaw nga ang kagamhanan nagpatuman usab nga hugot sa mga health protocol aron di mokompyansa ang katawhan bisan kon nabakunahan na.

Sa Estados Unidos, 88 porsyento sa bag-ong mga kaso sa Covid-19 wa mabakunahi. Mao nang naglabad ang ulo sa ilang mga opisyal. Duna nay mga estado nga nipabalik sa pugsanay nga pagsul-ob og mask.

Dinhi, dunay mga poster sa Facebook nga nanghadlok nga ang bakuna makamatay. Daghan na kuno ang nangamatay bisan kon di tinuod. Daghan hinuon ang nangamatay sa mga tawo nga way bakuna.

Plano sa mga pulis nga dakpon ug pasakaan og kaso ang mga social media user. Katungod sa usa ka tawo kon magpabakuna ba siya o di. Duna man guy mga report usab sa side effects sa mga bakuna hinungdan nga dunay mga vaccine brand nga gihunong sa makadiyot ang pagdapat kay gisusi ang mga tawo nga nagrabehan sa side effects.

Gipadayon ra ang pagdapat sa mga bakuna, apan duna nay mga pagpahimatngon sa posibleng epekto. Ilang gipadayon ang pagpamakuna kay nakita nga gamay ra ang dautang epekto kay sa maayo.

Bisan tuod kon katungod sa tawo ang pagpabakuna o di, lahi na sab nga estorya kon manghadlok na sa uban bisan di tinuod ang estorya, tumo-tumo ra.

Sa kadaghan na gani karon sa nabakunahan sa Pilipinas, wa pa may nataho nga namatay sa grabeng side effect sa bakuna. Naa ba?

Kon di ka ganahan magpabakuna kay nahadlok ka, hilom na lang, ayaw pangangin.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph