MABDOS nga secretary sa Guerrilla Front 55 sa Sub-Regional Committee 5, Southern Mindanao Regional Committee sa New People's Army (NPA) mitahan ngadto sa militar niadtong Miyerkules, Agosto 4, sa Pikit, North Cotabato.
Gibutyag sa tigpamaba sa Eastern Mindanao Command (Eastmincom)
nga si Major Alex Mindalano nga misurender si alyas Marikit sa pakig-alayon usab sa 602nd Brigade ug 90th Infantry Battalion sa Philippine Army.
Nasayran nga si alyas Marikit nalambigit sa daghang mga pagpangatake sa NPA sa Paquibato District sa Davao City.
Miyembro sab siya sa League of Filipino Sudents ug Gabriela Youth.
Dugay na siya nga gipanid-an sa militar tungod sa pagpangilkil ug operasyon sa NPA batok sa mga sundalo.
Anaa sa maayong panglawas si alyas Marikit nga giatiman sa militar, uban ang laing ahensiya sa gobyerno sa gitakda niya nga pagpanganak diin amahan niini taas sab nga opisyal sa NPA.
Gikompirma ni Eastmincom chief Lieutenant General Greg Almerol nga si alyas Marikit makadawat og tabang gikan sa Enhanced Comprehensive Local Integration Program sa gobyerno susama sa financial and livelihood assistance, housing, scholarship ug uban pa.
Nanawagan si Almerol sa uban pang NPA nga mosurender na ug manginabuhing malinawon. (Edgar E. Fuerzas)