GIPASIRADO sa Cebu City Government ang pampublikong sementeryo sa Barangay Labangon, Dakbayan sa Sugo, human gika-report nga adunay mga patay nga gihilom og lubong panahon sa gabii.
Kini ang gipahibawo ni Konsehal Dave Tumulak sa mga tigbalita sa Huwebes, Agusto 5, 2021.
Matod ni Tumulak nga adunay mga reklamante, kinsang sakop sa pamilya nga gilubong sa dapit gihabwa sa lubnganan bisan kon wala pa makaabot og lima ka tuig.
Ang giingong nihabwa ug nilubong mao ra usab ang mga piniyalan sa sementeryo, kinsa gikontrata sa mga punerarya.
Ang konsehal nitug-an nga nahitabo kini niadtong Hulyo diin nidagsang ang mga patay, apil na ang mga nangamatay sa coronavirus disease 2019 (Covid-19) sanglit way bakante ang mga sam-ang.
Si Tumulak niingon nga sa Agusto, niarang-arang na ang sitwasyon sa mga public cemetery ug aduna nay slots alang sa bag-ong namatay sanglit gihabwa na kadtong mga lubong nga niabot na ang ilang tagal.
Sa kasamtangan, adunay 171 ka slots sa public cemetery nga mahimong magamit para lubngan sa mga patay sa dakbayan sa Sugbo.
MOBANTAY
Ang City Health Department, pinangulohan ni Dr. Jeffrey Ibones, kauban ang Police Station 9 sa Barangay Labangon, uban ang mga opisyal sa barangay, maoy mag-regulate ug mag-monitor sa sementeryo sa A. Lopez aron wala nay bag-ong malubong pinaagi sa illegal.
Si Tumulak nakigtagbo sab sa mga opisyal sa St. Peter, Rolling Hills ug Cosmopolitan Funeral Homes aron mahatagan og prayoridad sa pag-cremate sa mga patay nga biktima sa Covid-19.
Gumikan niini, ang ilang management labi na sa Cosmopolitan, maoy unang nisanong sa awhag.
Gani, nag-andam na sila og duha ka mortuary freezer aron adto ipahiluna ang mga non-covid deaths.
Ilawom sa lagda, kinahanglan nga ipa-ubos sa cremation ang mga patay nga lawas nga biktima sa virus aron mapugngan ang pagkuyanap niini.