UPAT ka mga construction worker nga nagtrabaho sa dakbayan sa Sugbo ug padulong na unta mopauli sa Negros Oriental nasakpan nga sila positibo sa coronavirus disease (Covid-19).
Ang mga trabahante nga naa na sa isolation center sa Cebu City pulos mga lalake ning-abot sa pantalan sa Samboan hapon na sa Martes, Agusto 3, 2021 ug mobiyahe unta padulong sa Negros Oriental.
Si Erwin Gamallo, usa sa sakop sa Covid-19 Task Force sa Samboan, nagkanayon nga ang upat ka construction workers padulong na unta mosakay og barko biyahe sa Negros Oriental, apan sa dihang gisusi sa personnel sa Philippine Coast Guard ang ilang swab test result, pulos sila positibo sa Covid-19.
Wa makatuo ang mga sakop sa task force nga gusto sa upat nga mopalusot tungod kay ila ra mang gihatag diritso ug gipakita ang ilang swab test result.
“Wala man pud sila magtago-tago, gipakita ra dayon nila ang ilang papel. Ang ilaha ra gyud nga papaulion sila sa ilang pamilya,” matod ni Gamallo.
“Paglinya lage kuno didto sa Coast Guard, nakalitan sila kay unexpected man gud nga mohatag og papel unya positive ba.”
Base sa dokumento sa mga construction worker, alas 7 sa buntag niadtong Agosto 2 gikuhaan sila og swab ug nigawas ang resulta sa hapon niadto ra usab nga adlawa.
Sa Agusto 3 nibyahe kini padulong sa Samboan sakay sa usa ka bus nga pasaheroan. (ANV)