GIPASABOT ni Lapu-Lapu City Mayor Junard “Ahong” Chan nga dili na isyu ang pagpabakuna sa dakbayan sa Lapu-Lapu sa mga politiko nga dili taga dakbayan.
Kini ang tubag sa mayor human nga adunay mga mikuwestyon sa presensiya usa ka dakong politiko nga taga dakbayan sa Sugbo nga giingong sa Lapu-Lapu nagpabakuna.
Matod ni Chan, walay pili ang bakunahan sa dakbayan kun ugaling adunay gusto magpabakuna.
Ang iya nga buhaton mao ra ang pagparehistro aron matagaan og schedule.
Ang mga trabahante sa Mactan Export Processing Zone (MEPZ) dili tanan taga dakbayan apan pulos gibakunahan sa kagamhanan ug walay gipili.
Aduna usay mga taga Lapu-Lapu nga atua usab magpabakuna sa dakbayan sa Sugbo ug ubang lugar busa dili na kini angay himuong isyu.
Gihimug-atan sa mayor nga mismo si Presidente Rodrigo Duterte nag-awhag sa katawhan sa pagpabakuna hinungdan nga dili mobalibad ang lokal nga kagamhanan sa gustong magpabakuna.
Subling nanawagan si Chan sa katawhan sa pagpabakuna sanglit mao kini ang bugtong paagi nga malikay sa grabeng epekto sa Covid-19.
Gipahinumdoman usab sa Mayor ang tanan nga gumikan kay anaa sa modified enchanced community quarantine (MECQ) mas maayong undangon sa gayud ang nagkadaiyang paugnat sa kusog sama sa volleyball.
Kini aron magpundo usa sa tagsa-tagsa ka mga balay sulod sa mosunod 10 ka adlaw hilabi na kun dili bakunado.
Iya nang gimandoan ang kapulisan sa pagsusi sa mga subdivision ug village nga giingong nagpaduwa gihapon ug volleyball gumikan sa pagtuo nga dili kini contact sports.
“Ang importante atong bakunahan ang mag tawo kay nagkinahanglan sila ug bakuna mao ra man ni,” pagpasabot ni Chan.(GCM)