ANG magti-ayong KZ Tandingan ug TJ Monterde nga nagminyo sa niaging tuig, maayong pagkapares, tungod kay pulos mag-aawit.
Nakasabot sila sa mga kalihukan ug gimbuhaton niining maong propesyon.
Ning bag-o lang, nipagawas silag bag-ong playlist nga “Simula” (anaa na sa lainlaing digital platforms) ug naglakip sa mga kantang Dodong ug Inday.
Ang duha ka kanta nagpahayag sa ilang gugma sa usag-usa.
Duha na ka tuig nga gihimong pangkatulog ni TJ ang Inday samtang gisuwat ni KZ ang Dodong pito ka bulan sa wa pa sila magkasabot nga magminyo.
O diay, Binisaya kining mga kantaha.
Ideya ni TJ nga magpagawas og mga kantang Bisaya aron mapaduol ang pinulongan di lang sa mga kahibalo mosultig Bisaya lakip na usab sa mga di kasabot og Bisaya.
Nanghinaut ang duha nga mo-abli kinig mga kahigayunan alang sa mga kantang Bisaya tungod kay matud pa ni KZ, daghang mga banggiitang mga songwriters ug producers nga Bisaya nga nagpaabot lang sa mga kahigayonan.
Gusto usab sa magtiayon nga ipahibalo nga ang ‘Inday’ pulong sa pagmahal ug wa magpasabot nga katabang.
Ipagawas ang video sa duha ka kanta sugod ugma, Agosto 7, sa YouTube. Atangi.
Kon wa pa ni magbidabida si Tita Covid, alegre unta kaayo karon sa sulod ug palibot sa Cebu Provincial Capitol tungod sa pagsaulog sa Founding Anniversary sa lalawigan.
Apan bisan pa man sa sitwasyon karon, manghinaot pa gihapon ko sa usa ka makahuloganon nga pagsaulog.
Mo-duha na ka semana nga pirme na lang ko naa sa atubangan sa telebisyon.
Ang hinungdan? Ang Tokyo 2020 Olympics ug ang Premier Volleball League.
Akong nasaksihan ang mga dula sa mga atletang Pinoy lakip na sa Gold Medal winner nga si Hidilyn Diaz, skateboarder Margielyn Didal, swimmers Remedy Rule ug Luke Gebbie, gymnast Carlos Yulo, boxers Nesthy Petecia ug Carlo Paalam ug pole vaulter Ernest John Obiena.
Nidaug man o wala, ikapasigarbo lang gihapon ang mga atletang Pinoy tungod kay naningkamot gyud sila ug nakahatag silag maayong labok. Mga pahalipay!
Human sa duha ka tuig nga way gipahigayon nga dula ang Premier Volleyball League (tungod ni Tita Covid, may lain pa?), nakapahigayon na gyud kini didto sa Bacarra, Ilocos Norte.
Dominggo hangtod Biyernes ang liga ug duha ka dula kada adlaw ang gipahigayon. Kon wa ko masayop, tulo na ka dula ang ipahigayon sugod karon.
Tungod ning pagsige nakog lingkod atubangan sa telebisyon, napadaplin ang bag-o nakong gikabuangan nga pagkuriskuris (pulong ni Dante Luzon) ug pagpintalpintal.
Sige lang, mobalik ra ko sa naandan inig human ning duha ka mga kalihukan.