NON-AIRCONDITIONED nga pampublikong sakyanan lang ang tugotang makabiyahe sa Probinsya sa Sugbo panahon sa general community quarantine (GCQ) with heightened restrictions.
Sa Executive Order No. 35-B nga giluwat ni Cebu Governor Gwendolyn Garcia Huwebes, Agosto 5, 2021, miimplementar og dugang kamanduan si Garcia alang sa transportasyon aron malikayan ang pagkuyanap sa Covid-19.
Tugotan lang nga maka-operate ang mga non-airconditioned nga pampublikong sakyanan sa 75 porsyento nga seating capacity.
Ang airconditioned nga units gikinahanglan nga ablihan ang mga bintana.
Subay usab sa EO No. 35-B, ang tanang bus ug minibus nga mobiyahe sa Probinsiya sa Sugbo gikinahanglang mokuha og Provincial Public Utility Pass.
Ang mga drayber sa pampublikong sakyanan gikinahanglang nagsul-ob og face mask ug air purifier.
Ang tanang bus ug minibus nga mogawas sa Cebu South or North Bus Terminal gikinahanglang isyuhan og Trip Receipt nga adunay QR code, plate number sa unit, petsa sa pagbiyahe, trip route, control number, maximum seating capacity, gidaghanon sa pasahero, ug pirma sa dispatcher.
Mga pulis ipakatap aron pagsiguro nga nasunod ang mga lagda.
Ang Probinsya sa Sugbo gipaubos sa GCQ with heightened restrictions hangtud Agosto 15, 2021. (CLC)